XIII. Світовый конґрес Русинів одбуде ся в днях 19. – 21. юна 2015 в містї Дева в Румуніі
Світова рада Русинів (СРР) приняла рїшіня, же XIII. Світовый конґрес Русинів (СКР) одбуде ся в днях 19. – 21. юна 2015 року в містї Дева в Румунії. Присвяченый він буде 15. річницї прийнятя Културного общества Русинів Румунії (Uniunea Culturală a Rutenilor din Romania) до Світового конґресу Русинів.
Рада рїшыла выбрати Юрія Шыповіча з Підкарпатьской Руси (ред.: ???), за шефредактор часопису Голос Русина котрый є пресовым орґаном Світового конґресу Русинів. Окрем того, Рада дала рекомендацію прияти до чісла членів Світового конґресу Русинів – міджінародну сполоченьску орґанізацію «ОБЪЕДИНЕНИЕ РУСИНОВ» з Російской федерації (ред.: тривало їм то много років !!!). О приятю Русинів з Росії буде рїшати Конґрес, а Рада запропоновала рїшати о тім у тайнім голосованю.
Найвеце емоціоналнов частёв засїданя было настолене председом Стоваришыня Лемків Андріём Копчом дїло позбавлїня членства в Конґресїі делеґації Русинів з орґанізацій:
- Асоціація русиньскых орґанізацій зо США і Канады,
- Здружіня Русинів Чеськой републікы (ред.: О такім здружіню нич не знаме?! Членом СКР од зачатку было Общество приятелїв Підкарпатьской Руси. А теперь пару років у Чеську діє і орґанізація Русины.цз – ініціатіва Русинів Чеськой републікы),
- САРО – Словацьку асоціацію русиньскых орґанізацій.
Як пояснив пропонуючій, спомянуты орґанізації не платять членьске і не беруть участь на засїданях рады (САРО не має свого представителя в Радї – од автора ґ).
В повнім согласю СРР приняла рекомендацію про Конґрес о вылучіня тых орґанізаційіз членьсдтва в СКР.
Притомны доєднали ся тыж, же послїднїм перед Конґресом засїданём Рады буде початком мая в Будапештї.