30. научный семінар карпаторусиністікы
18. марeц 2015 быв присвяченый юбілейному 30. научному семінару карпаторусиністікы, якый в засїдалнї Consilium maiusРекторату Пряшівской універзіты традічно орґанізує Інштітут русиньского языка і културы Пряшівской універзіты в Пряшові.
Семінар отворила ПгДр. Кветослава Копорова, ПгД., котра привітала участників і представила выступаючу проф. ПгДр. Юлію Дудашову-Крішшакову, др. н., вызначну славістку, высокошкольску учітельку у функції професоркы, ґарантку докторандьского штудійного проґраму Славістіка – русиньскый язык і література. Професорка Дудашова за свій професійный жывот была членков або ведучов многых рїшытельскых колектівів вызначных научных проєктів і членков научно-бадательскых одборных орґанів, комісій, выборів і рад. Днесь є великым приносом про Інштітут русиньского языка і културы ПУ, нелем як довгорічна высокошкольска учітелька, але і як ерудована научна працовнічка з богатыма скушеностями і знанями.
Выступаюча сі на семінар приправила лекцію на тему Місто русиньского языка в родинї славяньскых языків. Тема лекції была повязана з єй недавнов великов роботов над моноґрафіов „Fonologický systém slovanských jazykov z typologického hľadiska“, в котрій є представленый ай русиньскый язык, як окремый мінорітный язык вєдно з далшыма славяньскыма языками (сербскым, хорватьскым, македоньскым...), котры ся наслїдком новой ґеополітічой сітуації поступно конштітуовали в новодобій Европі, але тыж языків, котры были в минулости з розлічных прічін мало вжываны (напр. білоруськый, кашубскый, босняцкым...). Фактічно в моноґрафії подала сінхронный опис фонолоґічных сістем ґенетічно прибузных языків (враховано русиньского). Такым способом описала фонолоґічны сістемы вшыткых сучасных славяньскых языків у сопоставлїню ід словацькому языку. Лекція о русиньскім языку в такім контекстї, як го представила професорка Дудашова выкликала много вопросів, якы участници семінара в рамках діскузії мали можность положыти.
На кінцю семінара быв презентованый 6. зборник рефератів Studium Carpato-Ruthenorum за рік 2014. Презентаціов минулорічного зборника і ґратулаціов професорцї Дудашовій к вызначному жывотному юбілею быв семінар закінченый.
Мґр. Зденка ЦІТРЯКОВА, Інштітут русиньского языка і културы ПУ, фоткы авторкы
Тексты к фоткам:
1. На зачатку 30. семінара карпаторусиністікы юбілантцї і главній реферуючій проф. ПгДр. Ю. Дудашовій-Крішшаковій, др. н., заґратуловала ПгДр. К. Копорова, ПгД., і передала єй цїнну „Енциклопедію історії і культури карпатських русинів“ зоставителїв П. Р. Маґочія і І. Попа.
2. Часть участників 30. семінара карпаторусиністікы, котрый на 18. марца 2015 на Пряшівскій універзітї у Пряшові зорґанізовав Інштітут русиньского языка і културы.
3. Часть участників 30. семінара карпаторусиністікы, якы собі выслухали лекцію ПгДр. Ю. Дудашовой-Крішшаковой, др. н., Місто русиньского языка в родинї славяньскых языків.
