Maлы школярикы ся учать по русиньскы

Школярикы, котры ся учать русиньскый язык зо своїма учітельками Ґ. Ребеёвов і Г. Сісковов. Фотка: -йо-

Тридцять дїтей од 3 до 6 років із Матерьской школкы на Тржебіцькій 13 у Гуменнім участь ся по русиньскы. Гравов формов звладають язык своїх предків у двох ґрупах пополудни під веджінём учітелёк Ґабріелы Ребеёвой і Гелены Сісковой. Інтересне є, же не вшыткы дїти, котры раз до тыждня до кружка русиньского языка ходять, суть русиньского походжіня!

Кідь споминаны учітелькы ословила авторка проєкту „вечурнїх“ школ Люба Кралёва з обчаньского здружіня Колысочка-Kolíska, жебы ся пустили до навчаня русиньского языка, выпросили сі час на роздуманя. Наконець ся рїшыли, же ідуть до того. Обознамили ся з цїлима централныма учебныма основами, з навчалным проґрамом і учебником русиньского языка про найменшых.

„Векшынов стары родіче дїтей бісїдують по русиньскы. Родіче, хоць походять з русиньскогзо оточіня, їх русиньскый язык не учіли. Але маме і такы дїти, котры не мають русиньскых предків“ – высвітлює учітелька Ґ. Ребеёва. „Маме учебник, як і робочі листы, котры собі дїти самы выфарблюють, участь ся так фарбы, овоцину і зеленину“ – додавать учітелька Г. Сіскова. Але основну часть творять русиньскы співанкы, стишкы, колядкы, вінчованя. Дїти але легко звладнуть заграти сі по русиньскы приповідку о рукавічцї і звірятках.„Маме план, подля котрого поступуєме. Учіме ся сполочно. Проґрес є видимый. Дїти по русиньскы выступили і на роздественній славности“ – говорить учітелька Ребеёва.

Мамка Яна Солна є тыж учітельков. Хоць в родинї русиньскы корїня не мають, 4-річну свою дївочку Янку записала тыж на русиньскый язык. „Бываме на сідліску, де жыють Русины. І много нашых сусїдів мать русиньске походжіня. Хочу, кідь ся єй старшы люде приговорять, жебы їм розуміла і знала одповісти“ – высвітлює своє рїшіня. „Занимам ся музиков. Также і про русиньскы співанкы, жебы їх знали правилно заспівати. Є природным явом мати і такы добры односины з русиньсков комунітов“ – додавать.

Віриме, же смак спомянутых школяриків учіти ся русиньскый язык їм зістане якнайдовше.

- К -

Go back