Стріча в Баньскій Быстріцї має свої резултаты

Як сьме вчера писали, Уряд уповномоченого влады Словацькой републікы про народностны меншыны 25. марца 2015 зорґанізовав сполочну робочу стрічу, на котру были покликаны представителї русиньской народностной меншыны і україньской народностной меншыны, котру але не заступала україньска орґанізація, но Союз Русинів-Українцїв Словацькой републікы.

 

За русиньску народностну меншыну были участны членове Округлого стола Русинів Словеньска (ОСРС). Стріча была выкликана протестным писмом, котре підпісало сім русиньскый орґанізацій і председа ОСРС. В писмі ся жадало, жебы не были з проґраму Култура народностных меншын підпорованы події, котры робить Союз Русинів-Українцїв Словацькой републікы, і жебы обще рїшыв ся вопрос існованя такой орґанізації. Русины вецераз акцентовали, же не мають проблем з україньсков народностнов меншынов, ани з орґанізаціями, котры суть україньскы. Проблемом є як раз Союз Русинів-Українців, котрый представує неекзістуючу меншыну.

 

Уряд уповномоченого написав на своїм сайтї лож, кідь о вчерашнїй стрїчі писав, же єй Уряд зорґанізовав на жадость двох спомянутых меншын, значіть русиньской і україньской. Русиньска народностна меншына не жадала о стрічу, но жадала не підпоровати події Союзу Русинів-Українцїв і жадала обще рїшіня екзістеёнції союзу. Так само было далшов лжов на сайтї Уряду, же стрїча має быти о взаємных односинах русиньской і україньской народностных меншын. Протест піпдисаный Русинами не быв проти україньской меншыны.

 

На вымушеній стрїчі орґанізованій і жаданій лем Урядом уповномоченого, не меншынами, было прияте (без голосованя і без підписованя выголошіня, значіть в режії Уряду) же дві народности, русиньска і україньска меншыны, хотять:

- прияти закон о народностных меншынах,

- заставити асімілацію народностных меншын,

- намагати ся с цілём всокотити кіріло-методійскы церьковны традіції,

- намагати ся на проспіх реґіоналного розвитку в областях, де жыють членове тых двох меншын;

- намагати ся довєдна, жебы ся всокотила азбука в области школства і освіты;

- продовжовати во взаємній комунікації о тых проблемах.

 

Петро МЕДВІДЬ, 26.03.2015

Go back