Уповномочена покликала на стрічу Русинів і Русинів-Українців
Уряд уповномоченого влады Словацькой републікы про народностны меншыны 25. марца 2015 зорґанізовав сполочну робочу стрїчу, на котру были покликаны представителї русиньской народностной меншыны і україньской народностной меншыны, котру але заступать Союз Русинів-Українцїв Словацькой републікы. Стріча проходила в Баньскій Быстріцї.
За русиньску народностну меншыну были участны членове Округлого стола Русинів Словеньска (ОСРС): Андрій Ліґа, председа ОСРС, Мілан Мнягончак, председа Русиньской оброды на Словеньску, Мілан Піліп, член Русиньской оброды на Словеньску і Ян Липиньскый зо Здружіня інтеліґенції Русинів Словеньска. Мнягончак і Липиньскый суть єдночасно і членове Выбору про народностны меншыны. За Українців были, як вже было спомянуте, участны членове Союзу Русинів-Українцїв Словацькой републікы.
Цїлём робочой стрїчі было подля пресовой справы Уряду уповномоченого вести діскузію о одкрытых вопросах взаємных односин тых народностных меншын (значіть русиньской і україньской). Робочой стрїчі была участна і сама повірена функціов уповномоченого влады Словацькой републікы про народностны меншыны Марія Єдлічкова і Алена Котванова, директорка Канцеларії Уряду уповномоченого влады Словацькой републікы про народностны меншыны.
Тота стрїча была выкликана протестным писмом, котре підпісало сім русиньскый орґанізацій і председа ОСРС. В писмі ся жадало, жебы не были з проґраму Култура народностных меншын підпорованы події, котры робить Союз Русинів-Українцїв Словацькой републікы, і жебы обще рїшыв ся вопрос існованя такой орґанізації. Русины вецераз акцентовали, же не мають проблем з україньсков народностнов меншынов, ани з орґанізаціями, котры суть україньскы. Проблемом є як раз Союз Русинів-Українців і їх події, кідьже доднесь союз не узнавать русиньску народностну меншыну, не узнавать русиньскый язык і бісїдує о Русинах як о части україньского народа і русиньску културу на своїх подіях презентує як културу україньску.
На Словакії суть як окремы народности узнаны русиньска і україньска меншыны. Зато зіставать вопросом, кідь хотїв Уряд уповномоченого діскутовати о односинах Русинів і Українцїв, чом знова покликав орґанізацію, котра репрезентує неекзістуючу меншыну Русинів-Українців. О резултатах стрїчі будеме інформовати.
Петро МЕДВІДЬ, 25.03.2015