Основатель першого хору на Лемковинї

16. септембра народив ся а 16. марца вмер Теофан Обушкєвіч (1841 – 1924) – священик і сполоченьско-културный діятель,  родом зо Ждынї. Основну школу скінчів у Ждынї, пак в Яслї.  Учів ся тыж у ґімназії в Новім Соанчу і Пряшові. Богословску освіту здобыв у  семінаріях во Львові, Кракові і Перемышлї.

Рукоположеный быв у 1867 роцї. Быв парохом у лемківскых селах: в Матієві, Розтоцї, Радоцінї, Ганчові. Коли душпастрирёвав у в тым остатнїм, помагав селянам з Устя Руського (теперь Ґорлицького) выкуповати паньскы лїсы, а окрем того основал там першый на Лемковинї хор і ансамбль, якый выступав на забавах. В 1890 роцї на просьбу америцькых Лемків пішов до США нести душпастырску послугу. Основав пару новых грекокатолицькых парафій і зміцнёвав тоты уж екзістуючі.

Брав актівну участь в орґанізації ґрекокатолицькой церькви в Америцї, постулёвав за єпіскопом про Русинів США, як тыж старав ся о основаня церьковных братств і світьскых орґанізацій про русиньскых еміґрантів. Т. Обушкєвіч быв сполуоснователём „Объєднаня Грекокатолицкых Рускых Братств“ – найвекшой орґанізації закарпатьскых ґрекокатоликів. В звязку з тым, же орґанізація мала проугорьску орьєнтацію сполуосновав „Рускій Народний Союз„, котрой членами могли быти вшыткы Русины без огляду на віру. По тім, як тота орґанізація зачала прикланяти ся ку проукраїньскій орьєнтації, Т. Обукєвіч охаблять єй і вступує до „Товариства Рускых Братств“. В роках 1905 –1909 быв редактором пресового орґану орґанізації – новинок “Правда”.

Орґанізовав збіркы грошей про Русинів, студуюючіх на Львівскій універзітї. Підпоровав діяльность „Руско-Народной Орґанізациі„. Утримовав листовый звязок з Лемковинов, быв добрым знамым о. Теофіла Качмарчіка з Білцаревы. Посылав тыж грошы арештованым Лемкам у Талерґофі.

Вмер 16. марца 1924 року в містї Фраквіль в США.