СІНДЕСМОС на Словакії святкує 25 років

Братсво православной молодежи на Словакії – СІНДЕСМОС тот рік святкує Світовы днї православной молодежи, но і 25-ый юбілей заснованя Братства на Словакії.

Святкованя орґанізує кошіцька ґрупа Братства православной молодежи СІНДЕСМОС і проходити буде в кошіцькім Православнім катедралнім храмі Успенія Пресвятой Богородіцї і св. Іоанна Милостивого. Святкованя зачне в пятніцю 17-го паріля 2015 р. вечурнёв, продовжовати буде великоднёв писанков і день молоды закінчать забавов зо жывов музиков. В суботу свята почнуть архієрейсков літурґіов і по ній буде гостина-аґапе, котра буде повязана з діскузіов на актуалны темы в Церькви і сполочности.

Братство православной молодежи на Словакії СІНДЕСМОС є орґанізаціов, котра робить з православнов молодежов і помагать ї при добрім і хрістіаньскім формованю і залучіню молодых людей до жывота Церькви. Братство є на Словакії офіціално реґістроване як обчаньске здружіня і є членом цїлосвітовой православной молодежной орґанізації СІНДЕСМОС. На Словакії існує моментално дакілько ґруп той орґанізації, котры актівно беруть участь у роботї і жывотї православных парохій. Тым, же є словацькый СІНДЕСМОС членом цїлосвітовой орґанізації, членове беруть участь і на різных міджінародных стрічах.

Петро МЕДВІДЬ, Пряшів