Хто винoватый?
В русиньскых інтернетовых новинках Голосы єм чітав аналітічнустатю Петра Медвідя з назвом Кому ся тым помогло? На тоту статю є дана ай єдна реакція од писателя Лаборець. В русиньскых інтернетовых новинках Русин є лем перебрана статя з новинок Корзар о тім, же в Гуменнім зрушыли народностну українску основну школу. Новинкы Русин не аналізують сітуацію з погляду русиньской, ани з погляду україньской основной політікы. Также погляд редактора новинок Русин на дануріч є нам незнамый, што є на шкоду дїла. Проблем із погляду розвоя русиньского школства є моцно важный. Кедь выходжу сам зостатї в інтернетовых новинках Русин о гуменьскій україньскій школї, так то розумлю так, же україньска народностна меншынова школа в Гуменнім не мать підпору у родічів, зато мала довогодобый проблем, а зато є довгодобо фінаначно в Гуменнім стратова, а зато была посланцями вырїшена на ліквідацію. Ланцкова реакція. Тотастатя як кебы з тов ліквідаціов україньской школы в Гуменнім была согласна і тїшыла ся з той ліквідації. Также з погляду русиньства уж не маме што аналізовати коло цітації проблему од Русина. Але в реалности проблем у Гуменнім є. Барс добрї тот проблем одгалили русиньскы інтернетовы новинкы Голосы. Зато хочу похвалити Петра Медвідя за ёго правилный новинарьскый приступ і за справодливе оцїнїня того, же школу в Гуменнім одповідны люде не захранили. Але єдночасно ся треба задумати ай над словами писателя Лабореця в новинках Голосы, де реаґує на статю Петра Медвідя і говорить, же проти школї в Гуменнім броїла політічна векшына в містьскім парламентї а же нихто не поміг школї, над котров вісів Демоклів меч, а зато буде плано з нами, Русинами, кедьсьме ся так плано заховали ку тій україньскій школї в Гуменнім.
Мій погляд на даный проблем є такый. Україньску народностну школу в Гуменнім в першім рядї мав хранити Союз Русинів-Українців Словеньской републікы (СРУСР). Председом того Союзу є Петро Сокол. Кедь Союз має в назві ай слово „Русинів“, так што бранило Петрови Соколови, жебы ся застав того, жебы ся в школї учів ай русиньскый язык? Ніч му не бранило. Як бы скуточнї тот Союз мав інтерес о Русинів, так бы представителї СРУСР, за помочі родічів Русинів-Українцїв, дали переписати україньску школу на русиньску народностну школу, така русиньска школа, може, бы доднесь успішно екзістовала. Але СРУСР не узнавать Русинів, не узнавать ани русиньскый язык. Слово „Русин“ в назві мають лем як масковачій артікел, не як знак узнаня Русинів. А теперь правда вышла наяво. Радшей челны представителї СРУСР охабили заникнути свою україньску школу, як бы мали склонити голову перед кодіфікованым русиньскым языком. Русины бы на русиньскый язык дали свої дїти, але на україньскый не дають. То не є хыба Русинів, ани містьского парламенту, же школа в Гуменнім заникла, але хыба намыслености функціонарїв СРУСР, котры не узнавають русиньскый язык за ровноцінный з україньскым языком.
Повідають люде, же кажда пыха предповідать пад. А ту маме назорный приклад пыхы і намыслености функціонарїв СРУСР. Вину на занику школы, подля мене, має СРУСР і їх председа, а нихто іншый.
Ян КАЛИНЯК, Свідник