А теперь уж поправдї отворено

Як вірна Русинка і русиньска актівістка уж не звладам слїдовати і чітати о тім, як дакотры Русины нищать і ліквідують нашы НАРОДНЫ НОВИНКЫ  на челї з їх шефредактором Александром Зозуляком. Тыж як нищать єден другого...!

 

Пробога, люде, спамятайте ся! Тадь А. Зозуляк і кідь зробив даякы хыбы у своїм жывотї (хто їх з нас не робить), зробив велике дїло про на Русинів у часї нашого возроджіня по роцї 1989. Через нашы Народны новинкы і часопис Русин шырив наше русиньске слово, традіції, історію, културу і ідентічность. В новинках боёвав за каждого з нас, за кажду єдну русиньску орґанізацію. Хотїв і потребовав грошы на розвиток многых актівіт, то є природно, же зо штату, але все діставав мало, як і теперь на приправу, выданя і дістрібуцію Народных новинок. І так глядав способы, як їх здобыти з іншых жрідел... Але доколи то так мож вытримати...?

 

Днесь, по многых хыбах, котры были зроблены, требало бы ся споїти і не нападати ся! Просила бы єм, окрем іншых „ненавістных“ Русинів, тыж пана Яна Липиньского із Здружіня інтеліґенції Русинів Словеньска з центром у Братїславі, жебы одшмарив  довгорічну ненавість ку А. Зозулякови і придав ся к людьскому, реалному рїшіню русиньскых проблемів  в СР. Не треба ся бавити на премудрых і надміру способных людей, бо вшыткы, ай кідь маєме в собі великы вартости, при своїх актівітах робиме ай хыбы...!

 

Нашы єдины, першы пореволучны Народны новинкы, часопис Русин і одданый Русин – А. Зозуляк, котрый шефовав тым выданя 25 років, заслужать собі з боку вшыткых Русинів Словеньска (а нелем зо Словеньска) велику честь, узнаня і оцїнїня, а не нападаня і ліквідованя.

 

Желам з цїлого свого русиньского сердця ку 25. річніцї єствованя Народных новинок  і часопису Русин  іщі много років їх выдаваня і іщі много про нас хосенных статей в них. А главно желам їх жертовному і вірному шефредакторови, нашому РУСИНОВИ – А. Зозулякови міцне здоровя, щастя, душевной сулы і правдивы, мудры і поучны статї о жывотї нас Русинів на Словеньску і во світї!

 

Марія ҐІРОВА, русиньска писателька і актівістка, Снина

Go back