„Русины на Українї мають быти узнаны,“ говорять домашнї охранцёве людьскых прав

Подля членів ґрупы, котра моніторовала права народностных меншын, котры жыють в Закарпатьскій области Україны, Русины на основі своїх очівідных етнічных особливостей мають быти узнаны як окрема народностна меншына на уровни цїлой державы. Інформовав о тім портал РБК – Україна. Навеце бы їм мали быти даны условії містныма державныма орґанами про їх права на народностно-културну автономію в повнім обсягу. Моніторуюча ґрупа о тім пише у своїй штудії. Вєдно з тым ґрупа охранцїв людьскых прав у штудії пише, же Русины і представителї іншых народностей на Українї суть діскрімінованы в рамках етно-културы.

Коло дослїджіня ґрупы, котра была сформована делеґатами орґанізацій про людьскы права зо вшыткых реґіонів Україны, представителями міджінародных орґанізацій і журналістами, было ословленых веце як 300 русиньскый родин в Ужгородьскім, Мукачовскім, Виноградовскім, Тячівскім, Берегівскім, Рахівскім і Хустьскім раёнах Закарпатьской области. Інформація о порушованю людьскых прав Русинів буде загнана посланцям Европарламенту і Высокому комісарёви ОБСЕ у справах народностных меншын.

 

Портал РБК – Україна підкреслює, же представителї Русинів веце раз жадали владу Україны, жебы їх узнали як окрему народностну меншыну, жебы была русиньска народность офіціално записана в списку народностных меншын Україны, і жебы была скінчена практіка пронаслїдованя прихыльників русиньского руху, котры роблять в державных штруктурах.

Причінов зачатя дослїджіня спомянутой ґрупы мала быти серія матеріалів у різных медіях о пробах представителїв народностных меншын Закарпатьской области о зорґанізованя діалоґу з владов Україны, повів прес-секретарь Всеукраїньской людьскоправной ґрупы Ігор Новосадюк. Далше Новосадюк інформовав, же причінов того дослїджіня было і то, же медії інформовали і о переданю Києву веце як 10 тісяч підписів жытелїв Закарпатя за узнаня Русинів за народностну меншыну і за обновлїня діалоґу о шырокій автономії Закарпатя у складї Україны.

 

Председа Рады народностных меншын Млада Вайсберґ інформовала, же, як то є записане і в штудії подля дослїджіня, Русины суть діскрімінованы, чім влада порушує нормы Общой декларації прав чоловіка і іншых документів, котры были прияты на міджінарній ці народній уровнях. Подля слов Вайсберґа, Русины мають мати забеспеченый цїлый комплекс прав, котры выходять із леґіслатівы державы, і то: право на народностно-културну автономію, право на хоснованя і навчаня материньского языка ці навчаня материньского языка в державных школах, право на створіня народностных културных і навчалных інштітуцій, право на представителїв коло орґанів державны.

 

„Вызываме ОБСЕ і Орґанізацію зъєдиненых народів, жебы до реґіону загнали позорователїв про моніторованя сітуації прав народностных меншын і одкрыли вопрос о їх порушованю на пленарнім засїданю Европарламенту,“ закінчує Млада Вайсберґ.

 

Петро Медвідь

Go back