Прияли святу євхарістію з рук митрополиты
17. і 18. май 2014 ся надовго запамятать 27 православным школярям сниньскых основных школ, котры по скінчіню реліґійного навчаня першый раз были на святій сповіди у о. Іґора Кереканіча в храмі Нанебовзятя Ісуса Хріста і наслїдно прияли першу святу євхарістію з рук архієпіскопа пряшівского і митрополиты Православной церькви чеськых земель і на Словакії, владыкы Ростислава.
18. мая 2014 мали сьме можность взяти участь на цілїй Святій літурґії в переповненім храмі в сниньскій части „На Брегох“, де жыє много выселеных Русинів із стариньской долины. Были сьме на вшыткых обрядах споєных з приятём першой святой євхарістії і мусиме конштатовати, же цїла подїя была добрї приправлена і мала незабытный святочный характер. Подобно як і слова о. Кереканіча і владыкы Ростислава, котры, віриме, же ся врыли глубоко до сердець малых і дорослых. Главно слова о. І. Кереканіча мі найвеце зарезоновали, же є смутне, кідь переважна часть дїтей і молодежи не жыє актівным духовным жывотом, але же ся з нима стрїчась лем на першій святій євхарістії, а пак аж на сповіди перед свадьбов. Підкреслив главно родічам, же приятём святой євхарістії ся не кінчіть, але зачінать актівный духовный, жывот у вірї в Ісуса Хріста і дотримованю вшыткых божых заповідей.
Вшыткы притомны з церькви по Святій літурґії одходили наповнены в душі божов любвов і, вірю, же врыли ся їм до сердець і слова владыкы Ростислава о любви к Богу, і домашнёго отця духовного І. Кереканіча. Хотїло бы ся вірити, же на наслїдных гостинах по святочній подїї окремы родины взяли собі за задачу вести своїх потомків к вірї в Ісуса Хріста і к своїм ближнїм. Любов к Богу бы ся мала перелинати з любвов міджі людми, мала бы мотівовати хотїня помочі єден другому, а то без чеканя даякой вдякы за то. Любити Бога і чоловіка – то бы мало быти каждоденным хлїбом насущным нашого жывота. А то є і одказом про школярїв, якы в тот день выкрочіли на свою нову хрістіаньску путь.с
А. З., фоткы автора
Фоткы:
1. Aрхієпіскоп пряшівскый і митрополита Православной церькви чеськых земель і Словакії владыка Ростислав міджі школярями, котры 18. мая 2014 до Церькви Нанебовзятя Ісуса Хріста в Снинї пришли прияти першу святу євхарістію.
2. Мило было чути, кідь сниньскый парох о. Іґор Кереканіч красным русиньскым языком пригварив ся участникам святой євхарістії.
3. На кінцю літурґії звязаной з приятём першой святой євхарістії з рук православного владыкы Ростислава дістали школярї сімболічне тїло Ісуса Хріста, котрый го жертвовав за нашы грїхы.
