Пряшів привітав ёго блаженoсть Ґеорґія ІІІ. Лагам

19. мая 2015 на Словакію пришов ґрекокатолицькый (мелкітьскый) патріарха Антіохії і цїлого Выходу, Александрії і Єрусалима з центром у Дамашку, ёго блаженость Ґеорґій ІІІ. Лагам. Патріарха навщівив Словакію на основі позваня підпредседу словацького парламенту Яна Фіґеля і ґрекокатолицького митрополіты і пряшівского архієпіскопа, высокопреосвященого Іоана Бабяка.

В першый день своё навщівы патріарха стрітнув ся, окрем іншого, із міністром загранічных дїл Словацькой републікы Мирославом Лайчаком, котрый му передав сімболічный шек на 10 000 евр, котры мають служыти на поміч войнов постигнутых людей в Сірії. Потім мав патріарха в просторах Прімаціалного палаца в Братїславі лекцію на тему під назвов Пронаслїдованя хрістіанів – як їм помагати.

20. мая 2015 патріарха продовжовав свою навщіву в Пряшові. Окрем пріватных стріч, быв приготовленый і проґрам про верейность. Наперед о 14.00 год. проходила стріча з бісїдов у авлї Ґрекокатолицькой теолоґічной факулты Пряшівской універзіты в Пряшові. О 16.30 год. патріарха вєдно з пряшівскым архієпіскопом і далшыма владыками служыти церьковнославяньску архієрейску літурґію в Катедралнім соборі св. Іоана Хрестителя в Пряшові.

Пресова аґентура Ґрекокатолицького архієпіскопства в Пряшові пише, же навщіва патріархы є нагодов, жебы віруючі были чутливішы про потребы тых, котры в Сірії і в многых далшых державах терплять про свою віру. На Квітну недїлю, котра была 29. марца 2015 (за новым календарём), ґрекокатолицькы віруючі Пряшівской арієпархії приспіли сумов 17 000 евр на збірку, котра была якраз на поміч про пронаслїдованых хрістіанів.

Патріарха Ґеорґій ІІІ. Лагам днесь не є в Пряшові першыраз. Центер ґрекокатолицькой митрополії на Словакії на позваня владыкы Іоана навщівив уж і в 2006 роцї.

Петро Медвідь , 20.5.2015