Выголошіня 16. річника цїлословеньского конкурзу Духновічів Пряшів 2015

Русиньска оброда на Словеньску (РОС), Окресный уряд, одбор школства у Пряшові выголошують 16. річник цїлословеньского конкурзу в декламації русиньской поезії, прозы, властной творчости, малых сценїчных форм і народного росповіданя – ДУХНОВІЧІВ ПРЯШІВ 2015. Kонкурз ся одбуде 16. юна 2015 в Театрї Александра Духновіча в Пряшові од 9.00 год. В цїлословеньскім конкурзї можуть брати участь дїти матерьскых і основных школ, штуденты середїх і высокых школ, а так само дорослы – вшыткы декламаторы, котры на окресных, школьскых ці іншых поступовых конкурсах  здобыли 1. місця.

Катеґорії Дыхновічового Пряшова (ДП) 2015:

0 – дїти МШ і школярї 1. класы ОШ,

1 – школярї 2. – 3. класы ОШ,

2 – школярї 4. – 6. класы ОШ,

3 – школярї 7. – 9. класы ОШ,

4 – штуденты середнїх і высокых школ,

5 – дорослы.

Жанры ДП 2015:

Вшыткы жанры будуть мати свої катеґорії од 0 до 5, на 16. ДП 2015 бы мали звучати русиньскы творы – поезія (од русиньскых авторів або переклады іншых авторів до русиньского языка), а так само проза, властна творчость, малы сценїчны формы (театралны гры, сценкы) і народне росповіданя (гуморны пригоды, фіґлї). Є округла річніця од смерти А. Духновіча, зато бы было добрї, кібы т. р. зазвучала на ДП і ёго поезія.

Оцїнїня участників ДП 2015:

Каждый участник 16. ДП 2015 дістане діплом і належну цїну. Вітязї будуть оцїнёваны одборнов поротов од 1. по 3. місце і буде выголошеный Лавреат 16. ДП 2015.

Подорожнє, страва про декламаторів і педаґоґічный допровод і цїны про вітязїв забезбечіть главный орґанізатор конкурзу: РОС і Окресный уряд, одбор школства в Пряшові.

Дорогы Русины, придьте до нашого театру підпорити нашы дїти, молодеж і наше родне русиньске слово. Придьте затляпкати нашым декламаторам і іншпіровати їх до далшой наукы і пропаґації русиньской літературной творчости.

Акція ся реалізує з підпоров Уряду влады СР – проґрам Култура народностных меншын 2015.

Петро Медвідь, 19.5.2015