Доц. ПгДр. АннаПлїшкова, ПгД. – 50

Родачка з Пыхонь, окр. Снина, народила ся 27. юна 1964.В Пыхнях выходила першых пять клас основной школы, дале ся вчіла в Снинї, де закінчіла середнёшкольскы штудії на сниньскій ґімназії. В роках 1982 – 1987 штудовала на Філозофічній факултї Універзіты Павла Йозефа Шафаріка в Пряшові  учітельску комбінацію україньскый язык і література – словацькый язык і література. По універзітных штудіях в роках 1987 – 1991 робила як редакторка україньскоязычного тыжденника Нове життя, в роках 1991 – 1998 як редакторка русиньскоязычных періодік – часопису Русин  і в тім часї тыжденника Народны новинкы. Од року 1998 є высокошкольсков учітельков русиньского языка на Пряшівскій універзітї. В роцї 2006 на Славістічнім інштітутї Яна Станїслава Словацькой академії наук в Братїславі обгаїла під веджінём вызначного славісту проф. ПгДр. Яна Дорулї, др. н., докторьску дізертацію на тему Списовный язык карпатьскых Русинів: проблемы становлїня, кодіфікації, акцептації і сфер функціонованя. В роцї 2010габілітовала ся на Універзітї Яна Амоса Коменьского в Братїславі (габілітачна робота Language and National Identity : Rusyns South of  Carpathians. East European Monographs. New  York: Columbia University Press, 2009.  230 с.) і здобыла в одборї Славяньскы языкы і літературы научно-педаґоґічный тітул „доцент“ про русиньскый язык. Наслїдно на Пряшівскій універзітї ся стала одборным ґарантом бакаларьского і маґістерьского штудійного проґраму русиньскый язык і література і сполуґарантом докторьского штудійного проґраму славістіка – русиньскый язык і література. Од року 2008 є директорков Інштітуту русиньского языка і културы Пряшівской универзіты. В домашнїх і загранічных выдавательствах опубліковала три научны моноґрафії, понад 100 научных і одборных робот, з того 13 учебників про основны, середнї школы і высокы школы, на якы зазначіла 130 домашнїх і 35 загранічных цітацій, з того понад 20 евідованых в найбівшых світовых цітачных датабазах рецензованой літературы Web of Science, Scopus і другых. За свою научно-педаґоґічну роботу была оцїнена Памятнов плакетов ректора ПУ (2012) i Преміов Антонія Годинкы за розвой русиньского языка і културы Общества А. Годинкы в Будапештї (2014).

Щіро ґратулуєме!

-р-

(Шырша статя о юбілантцї буде опублікована в далшім чіслї інтернетовых новинок Академія русиньской културы в СР.)