Державны екзамены на Інштітутї русиньского языка і културы ПУ

В днях 28. – 29. мая 2015 одбыли ся на Інштітутї русиньского языка і културы Пряшівской універзіты в Пряшові державны екзамены штудентів бакаларьского і маґістерьского учітельского штудійного проґраму русиньскый язык і література.

 

В першый день обгаёвали свої роботы кандідаткы на тітул бакаларь – Александра Іванїшова і Вероніка Шебестова (їх бакаларьскы роботы были з области русиньской літературы).Дві далшы кандідаткы: Домініка Прочкова і Катаріна Петрусова (писали свої бакаларьскы роботы з другого апробачного предмету) абсолвовали заключны екзамены. З радостёв можеме конштатовати, же вшыткы штири кандідаткы здали державны екзамены і здобыли бакаларьскый тітул. Од наступного школьского року будуть продовжовати в штудію на маґістерьскім ступню.

 

Другый день (29. мая) здавали екзамены дві кандідаткы з другого ступня высокошкольского штудія: Бк. Яна Ріґанова і Бк. Михала Гудакова. Перша з них обгаёвала маґістерьску роботу з методікы навчаня русиньского языка, друга свою маґістерьску роботу писала з другой шпеціалізації. Обидві кандідаткы здали успішно заключны екзамены зі здобыли тітут маґістер в шпеціалізації учітельство общоосвітнїх предметів – русиньскый язык і література в комбінації з другым апробачным предметом.

 

-кк-, фоткы:З. Цітрякова

• 28. юна 2015 по успішнім скінчіню державных екзаменів бакаларьского проґраму на ІРЯК ПУ на памятку ся сфотоґрафовали єй участници: (злїва доправа у першім рядї) екзамінуючі учітелї – проф. ПгДр. Ю. Дудашова, др. н., доц. ПгДр. В. Ябур, к. н., доц. ПгДр. А. Плїшкова, ПгДр., і ПгДр. К. Копорова, ПгД., і (у другім рядї злїва) доц. ПгДр. А. Атоняк, к. н., (у другім рядї справа) Мґр. В. Падяк, к. н.,, (всерединї в другім рядї злїва) екзаменованы – В. Шебестова, К. Петрусова, Д. Прочкова і А. Іванїшова.

• Свою презентацію на державнім екзаменї на ІРЯК ПУ успішно зробила: (злїва) Бк. Я. Ріґанова за притомности екзамінуючіх В. Падяка і К. Копоровой.

• По успішных державных екзаменах маґістерьского проґраму на ІРЯК ПУ у Пряшові: (злїва) Бк. М. Гудакова і Бк. Я. Ріґанова.

Go back