Одкрыли Studium Carpato-Ruthenorum 2015 на Пряшівскій універзітї
В недїлю 7-го юна 2015 р. ся святочно одкрыв уже 6-ый річник проєкту Studium Carpato-Ruthenorum. Міджінародна лїтня школа русиньского языка і културы Studium Carpato-Ruthenorum 2015 зачала о шестій годинї вечур в пряшівскім пензіонї „Atrium“ офіціалныма выступами директоркы Інштітуту русиньского языка і културы ПУ доц. ПгДр. Анны Плїшковой, ПгД., пріматоркы Пряшова Інж. Андреї Турчановой i посланця заступительства Пряшівского высшого теріторіалного цїлку Мґр. Петро Крайняк.
Потім быв културный проґрам, в котрім выступили абсолвенткы бакаларьского штудійного проґраму русиньскый язык і література в комбінації з іншыма предметами – Бк. Верокіна Шебестова і Бк. Домініка Прочкова. На конець была святочна рецепція.
На 6-ім річнику літнёй школы, котра ся закінчіть в суботу 27-го юна, будуть того року чітати лекції лекторы в складї: ПгДр. Кветослава Копорова, ПгД. із Інштітуту русиньского языка і културы Пряшівской універзіты в Пряшові, Мґр. Марек Ґай – екстерный сполупрацовник спомянутого інштітуту, проф. Др. Павел Роберт Маґочій із Торонтьской універзіты, Мґр. Валерій Падяк, к. н., із Дослїднёго центра карпатістікы в Ужгородї, проф. Др. Елена Будовская із Джорджтавньской універзіты у Вашінґтонї і проф. ПгДр. Микола Мушинка, др. н, котрый є екстерным сполупрацовником Інштітуту русиньского языка і културы. Лекції будуть по русиньскы і по анґліцькы.
Вже традічно почас лїтнёй школы передавать ся і Премія Александра Духновіча за русиньску літературу. Того року ся так стане в рамках традічного літературного вечора в четверь 26-го юна. Подія зачне о 19.00 год. на велипкій сценї Театру Александра Духновіча в Пряшові. Тота подія одкрыта про верейность.
Текст і фоткы: А. З.
Тексты к фоткам:
• На зачатку отворїня 6. Міджінародной лїтнёй школы русиньского языка і културы на Пряшівскій універзітї у Пряшові выступили: (справа) пріматорка Пряшова Інж. А. Турчанова, посланець Пряшівского высшого теріторіалного цїлку Мґр. П. Крайняк і директорка Інштітуту русиньского языка і културы ПУ доц. ПгДр. А. Плїшкова, ПгД.
• Честны гостї, учітелї і штуденты Studia Carpato-Ruthenorum 2015. Першый ряд злїва: проф. Др. Е. Будовская, Мґр. В. Падяк, к. н., доц. ПгДр. А. Плїшкова , ПгД., проф. Др. П. Р. Маґочій, ПгДр. К. Копорова, ПгД. і Мґр. П. Крайняк.
• У културнім проґрамі отворіня лїтнёй школы русиньского языка і културы выступили тогорічны абсолвенткы бакаларьского штудійного проґраму русиньскый язык і література в комбінації – спісвачкы В. Шебестова і Д. Прочкова, котра їх выступлїня допроваджала гров на акордеонї.