Духновічів Пряшів 2015

Дорогы Русины, писателї, културны актівісты, учітелї, родічі, гостї, любителї русиньского языка позываме Вас на 16-ый річник цїлословеньского конкурзу в декламації русиньской поезії, прозы, властной творчости, малых сценічных форм і народного росповіданя – Духновічів Пряшів 2015.

Конкурз ся одбуде 16-го юна 2015 од 9.00 год. на великій сценї Театру Александра Духновіча в Пряшові. Конкурз приправили: Русиньска оброда на Словеньску, одбор школства Окресного уряду в Пряшові і МО РОС у Пряшові. На конкурзї перед одборнов поротов выступлять декламаторы різных віковых катеґорій – од найменшых дїтей із матерьскых школ, учнї основных школ, штуденты середнїх і высокых школ аж по катеґорію дорослых.

Дорогы Русины, придьте до нашого театру підпорити нашы дїти, молодеж і наше родне русиньске слово. Придьте затляпкати нашым декламаторам і іншпіровати їх до далшой наукы і пропаґації русиньской літературной творчости.

-ак-