Русинам ґратуловали у Парламенті ЧР

У просторах фойе парламента Чеськой републікы у Празі (ул. Снємовні 4) перебігла доста важна културно-общественна акція. 19. юнія из участёв предсідника Коморы депутатів Парламента ЧР Яна Гамачка депутатам и сенаторам, поважным чеськым и русинськым гостям была презентована чеська верзія меґа-проекта «Народ нывыдкы» – «Narod odnikud» (Ужгород, Выдавательство Паядка, 2014). У презентації ся зучастнили автор книгы проф. Павел Роберт Маґочі з Торонтського універзітета, выдаватель книгы кандідат наук из Ужгорода Валерій Падяк, чеськый перекладач книгы Др.Мірослав Копецькый и многі далші гості, про котрых карпаторусинські вопросы суть важнов частёв їх културных ци й фаховых інтересів.

 

Ид притомным на презентації приговорили предсідник Коморы депутатів Парламента Чеськой републікы Ян Гамачек, депутат парламента Їржи Юнек и автор книгы проф. П.Р. Маґочі, прес-секретарь предсідника Коморы депутатів Парламента ЧР Петр Ворлічек (модератор акції). Доста искрасили акцію фраґменты из текста презентованой книгы, котрі выбрав и процітовав депутат Ї. Юнек, добрый знатель карпаторусинськой історії и сакралной архітектуры, у минулости діректор Реґіоналного музея у Вісокім Міті. Ушыткі промовці підчеркнули актуалность чеського выданя, котре припоминат читателю важні факты из общой історії чехів и карпаторусинів, але и высоко цінит вплыв чеськой демократичной сістемы на соціално-політичный, економічный и културный розвой Підкарпатськой Руси.

 

Выдавательство подарило сто фалатків презентованой книгы бібліотекам універзітетів, научных и діпломатичных інстітуцій Чехії, а до того по єден фалаток каждому из двасто депутатів парламента.

 

Ілустрована історія выходит уж у девятій языковій верзії, главно в языках історичных сосідів карпатськых русинів – словаків, чехів, мадярів, українців, хорватів, румунів а т. д. Русины по півстолітію екзістенції без права на свою заказану тоталітарнов сістемов народность изясь стали частёв великой родины централноевропськых народів. Презентована книжка многыма языками повістує за історію, културу, традиції и віру карпатськых русинів

 

Валерій ПАДЯК, фотка автора

(Публікуєме в оріґіналї: підкарпатьскім варіантї русиньского языка.)

 

 

Фотка: 19. юнія 2014 из участёв предсідника Коморы депутатів Парламента ЧР Я. Гамачка (на фото чітать приговор),  депутатам и сенаторам, поважным чеськым и русинськым гостям была презентована чеська верзія меґа-проекта «Народ нывыдкы» – «Narod odnikud». Ёго автор проф. П. Р. Маґочїй першый злїва.

Go back