Малокласны школы тот рік на Словакії зістануть

• Малокласна Основна школа А. Кралицького в Чабнинах із навчалным языком русиньскым.

Посланець словацького парламенту за партію Most-Híd Арпад Ерсек позмінюючов пропозіціов ку новелізації школьского закона, котров ся мала становити мінімална кількость школярїв в класї основной школы, досягнув одклад платности того закона. На основі того закона мали быти од 1-го септембра 2015 р. на теріторії Словакії зрушены малокласны школы, што ся найвеце дотулять народностных школ. Про Русинів бы то быв конець основного школства. Інформує о тім сайт партії Most-Híd.

 

Тішыме ся, же влада схвалила нашу позмінюючу пропозіцію і так родічі і дїти, котры ходять до малокласных школ, не мусять бояти ся, же вже по тых лїтнїх вакаціях зрушать їх класы,“ реаґовал посланець Арпад Ерсек. На нове оцїнёваня ефектів, котры зо собов рушіня малокласных школ приносять, здобыв ся час до 1-го септембра 2016 р. Проблем так буде мусити рїшыти нелем сучасна, але і будуча влада, кідьже на Словакії будуть на ярь 2016 р. парламентны выльбы.

 

Ерсек в офіціалній пресовій справі партії далше повів, же „влада явно не має інтерес на тім, жебы учітелїв школ з навчалным языком народностных меншын одбременила од даремной адміністратівной затяжі і в цїлковім наслїдку помогла ку высшой якости навчалного процесу на меншыновых школах.“ Most-Híd подавав і далшы позмінюючі пропозіції, котры ся дотуляли як раз той проблематікы, але тоты пропозіції не были схвалены.

 

На Словакії суть вшыткы школы, котры суть з навчалным языком русиньскым, або котры мають в навчалнім процесї навчаня русиньского языка, лем малокласны школы. В припадї рушіня малокласных школ бы Русины пришли о цїле основне школство і навчаня русинького языка бы зістало лем в рамках проєкту вечурнїх школ, котры робить обчаньске здружіня Колысочка.

 

Петро МЕДВІДЬ

Go back