Радка Ясикова – вітязка літературного конкурзу

Літературны таленты 2015 – то є назва уж 22-го річника конкурзу непрофесіоналных літературных творцїв вшыткых віковых катеґорій з окресів Гуменне, Снина і Меджілабірцї, котры пишуть у языку народностных меншын.

 

В конкурзї, котрый зорґанізовала Вігорлатьска бібліотека в Гуменнім, взяло участь 25 дїтьскых авторів із своїма 39 роботами з 4 основных школ і єден дорослый. Найвеце літературных робот пришло уж традічно з Освовной школы Анатолія Кралицького з навчалным языком русиньскым у Чабинах, де учітельков русиньского языка і директорков є ПаедДр. Марія Ясикова. Тых робот із Чабин было 21 од 10 авторів, але запоїли ся і школярї з Радвани над Лабірцём, Стащіна і гуменьской Основной школы на Лісній уліцї. Катеґорію дорослых репрезентовав Петро Ялч з Міджілаборець. На роздїл од попереднїх років, кідь до конкурзу приходили роботы і в україньскім языку, минулорічні і сучасны роботы были вшыткы написаны лем по русиньскы.

 

Перше місце в конкурзї здобыла Радослава Ясикова з Чабин, друге Крістіна Дінічова із Стащіна. Треба вірити, же на другый рік ся до літературного конкурзу запоять з по русиньскы написаныма роботами школярї і дорослы і з іншых міст і сел.

Go back