Засїдав Округлый стіл Русинів Словеньска. Тема єпіскопства ся пересунула

27-го юна 2015 р. проходило в Пряшові вже 16-те засїданя Округлого стола Русинів Словеньска (ОСРС). Найголовнїшый пункт засїданя пересунув ся на далше засїданя, котре буде прохидити по лїтнїх вакаціях.

Найважнїшым пунктом того засїданя русиньской діскусной платформы мало быти поданя інформації о можливости зряджіня русиньского єпіскопства з погляду выходного католицькго канонічного права. Інформацію мав подати священик Марош Прейса, котрый в ОСРС діє як представитель Ґрекокатолицького архієпіскопства в Пряшові. Кідьже ся про робочі обовязкы за свою неучасть допереду оправдав і свою неучасть на тім засїданю оголосив і ґрекокатолицькый свяченик Мілан Ясик із Общества св. Йоана Крестителя, котре найвеце довгды рокы підкреслює потребу душпастырьства заміряного на Русинів, членове ОСРС пересунули тот пункт проґраму на найблизше засїданя, котре буде проходити по лїтнїх вакаціях.

Но Округлый стіл мав в проґрамі і далшы важны пункты. Членове ОСРС были інформованы о проходжіню 13-го Світового конґресу Русинів у румуньскім містї Дева, котрый одбыв ся лем тыждень дозаду. Хоць ОСРС не є прямо членом конґресу, кідьже іде о одкрыту платформу, котра зъєдинять многы русиньскы обчаньскы здружіня, окремых незалежных актівістів і русиньскы професіоналны інштітуції, но ёго членове суть і членами конґресу. Конкретно є то Русиньска оброда на Словеньску і орґанізації, котры входять до Словеньской асоціації русиньскых орґанізацій. Такым способом ОСРС має контакт із міджінародным русиньскым рухом. Членове ОСРС перед проходжінём конґресу обернули ся і на втогдышнёго председу Світовой рады Русинів зо жадостьов, жебы почас конґресу была зачата діскузія о русиньскій сімболіцї, чому як основа має служыти книжка Мілана Пилипа під назвов Русиньска народна сімболіка. Конґрес пропозіцію прияв і о проблематіцї сімболікы бы ся мало в окремых членьскых державах бісїдовати цїлый рік, жебы до двох років, покля буде проходити далшый конґрес, міг быти вопрос сімболікы вырїшеный і конґресом пропозіція прията.

Люба Кралёва, котра є в ОСРС представительков за обчаньске здружіня Колысочка, інформовала участных о стрїчі членів ОСРС з представителями Міністерства школства Словацькой републікы. Участны засїданя по інформації од Любы Кралёвой згодли ся в тім, же про злїпшіня сітуації в русиньскім школстві буде треба тискати на зміну школьского закона, котрый бы може міг раховати із позітівнов діскрімінаціов про школы з навчалным языком або навчанём языка народностных меншын. Днесь ся русиньске школьство мусить стрічати із такыма основныма проблемами, як є неохота з боку міністерства рїшыти вопрос выдрукованя букварів, котры уж многы рокы не суть і так є огрожене тото найосновнїше навчаня, з котрым ся в школї зачінать.

ОСРС зволив у доповнюючіх вольбах і нового члена презідії. Од того засїданя заступать індівідуалных членів у найвысшім орґанї ОСРС Анна Кузмякова.

Петро МЕДВІДЬ, пресовый говорця ОСРС

Go back