Вступне слово выдавателя

Дорогы нашы членове і сімпатізанты, перешов далшый рік а мы Вас наново хочеме почестовати новым выданём Вашого облюбленого Ґрекокатолицького русиньского календаря. Рік, котрый є за нами і котрый Святый отець Франтїшек выголосыв за юбілейный рік Сімболестной Богородіцї, а наш владыка Йоан Бабяк, пряшівскый архієпіскоп і митрополита присвятив родинї, мав бы принести богаты духовны плоды і до нашых русиньскых родин.

Ікона Святой родины, котра путовала по нашых родинах, мала припомянути окрем силы молитвы і незаступне місце отця і матери, послухняность дїтей і нероздїлне споїня Тайны манжелства. Правда, были і суть великы атакы з боку неприятеля, котрый не складать зброю і новыма формами вношать підозрїваня, обаламучує „новов філозофіёв“ і чекать на слабости міцных того світа, котры послужать ёго дїлу – розвернути добро каждой родины. Зато і мы не складайме духовну зброю в нашых родинах ани в наступнім роцї 2015.

Частым образом в нашых родинах є одходжаня головы родины-отця за роботов, а так мама зіставать на довгый час єдинов „затоятельков“ родины. Но праві жены были тыма, котры спроваджали Ісуса на крестній дорозї і послужыли ёму: не бояли ся выйти на Ґолґофту під крест, понагляли ся потемрї ку гробу помазати Ісуссове тїло і сміло оголосили ёго воскресїня  ученикам.

Зато і нашы жены-мамы мають смілого духа і щіросердечне сердце про свою родину, глядають притулок під покровом міцной застоятелькы Марії і ведуть свої дїточкы дорогов доброго прикладу і побожности. Молоды дївочкы, котры раз будуть невістами і мамами, най теперь забоюють нелем за красоту тїла, но іщі міцнїше за красоту душы і чістый передманжельскый жывот, бо лем з такым богатством дозріють про успішный і благословенный манжельскый жывот. А маленькы дївчатка най своїма горячіма молитвами, котры выходять із чістого сердця, провадять своїх родічів у намаганю ся про родину, бо сам Ісус Хрістос їм одповідать, же „такым належыть Царство небесне“ (Мт. 19, 14).

Намагайме ся і в тім новім роцї 2015 вєдно провадити молитвов нашы родины і кажде манжелство окремо.

„Господу Боже наш, ты у своїм спасительскым передвідїню, через твій оприход до Каны Ґалілейской доволив, жебы ся манжелство выявило як дорогоцїнне. Ты сам теперь сохрань в покою і взаємнім порозумлїню нашы манжелства і родины. Выяв нам, же кажде манжелство є дорогоцїнне, утримай го без скверны нечістоложства, доволь най сполочный жывот в родинї буде без провин, і каждый у родинї буде без провин, і каждый в родинї най радо дотримує твої заповідї цїлым своїм сердцём.

Бо ты єсь наш Бог, Бог, котрый давать милость і спасїня , а тебе, заєдно з твоїм беспочатковым Отцём і твоїм пресвятым, добротливым і жывототворным Духом прославляме і теперь і навсе, і навіккы-віків. Амінь.“ (Малый требник І.).

о. Ярослав ПОПОВЕЦЬ, председа ОСЙК

(Ґрекокатолицькый русиньскый календарь на 2015 рік.)

Go back