Боже, так довго єм чекала ...

... на тот великый момент, кідь нашы Русины собі до свого чела выберуть і зволять Русинів честных, мудрых, люблячіх свій народ, а не грошы, людей одданых великому русиньскому дїлу і великым традіціям свого роду.

 

Міцно єм як Русинка сщастлива зато, же нашы Русины по селах і містах доказали роспознати фалошность од правды. Же своїма голосами на Сеймі Русиньской оброды на Словеньску (РОС) доказали вычленити з веджіня людей фалошных, „фарізеїв“.

 

Бо дость маєме біды з „Русинами“, котры нам взяли нашу русиньску ідентічность, нашу історію, нашы традіції, нашу дїдовизну і презентують вшытко уж веце як пятьдесять років у Словеньскій републіцї і у світї як україньске ...

 

He допустьме, жебы сьме ся і мы скуточны і „неперероблены“ Русины, котры за своє русиньске дїло боюєме высше двадцять років, теперь дїлили ся і „били“ міджі собов!

Мусиме ся зєдинити і міцно тримати вєдно. Мусиме тїсно і глубоко сполупрацовати міджі собов. Мусиме підтримати і підпорити каждого єднотливця і орґанізацію в їх красных і хосенных актівітах  на хосен Русинів. Словом, мусиме быти єднотны, довірёвати собі, помагати і сполупрацовати! Не смієме ся ненавідїти і завідїти собі!

 

З глубокого свого русиньского сердця ґратулую РУСИНОВИ, котрый має добре сердце, душу і порозуміня про вшыткых нас. Русинови, котрый, вірю, же буде нас Русинів зъєдиняти, а не роздїлёвати. Русинови, котрый нас вшыткых буде підпорёвати і сполупрацовати зо вшыткым, з каждым. Мудрому Русинови, котрого сьме собі зволили за свого воджатая в Словеньскій републіцї (позн. ред.: як председу РОС).

 

Як русиньска актівістка  із Снинщіны, желам Вам, пан Інж. Мілан Мнягончак, у Вашій функції (позн. ред.: председы Русиньской оброды на Словеньску) і роботї на благо Русинів (позн. ред.: і як член выбору діскусного фора Округлый стіл Русинів Словеньска і председа політічной партії Наш край) міцне здоровя і много, премного успіхів у каждоденнім жывотї і роботї!

Ведь ай тот першый русиньскый фестівал у Гуменнім, котрый сьме сполочно з Вашыма шыковныма Русинами зорґанізовали 11. мая 2014, свідчіть о тім, же красна сполупраца людей і порозуміня приносять великы сімячка, котры падають на нашу русиньску уродну груду і на душу каждого єдного з нас.

 

Дай нам, Боже, велику силу,

мудрость, честность, одповідности

і прекрасны творчі успіхы

в здобываню свого ідентічно

родного самобытя!

 

Марія ВАСЬКО ҐІРОВА, Снина

Go back