Улiця св. Владиміра Великого в Криніцї

Як подає офіціялный сайт ПАПЦ orthodox.pl, 28. юла 2015 р., почас святковань 1000. річніцї смерти св. Владиміра Великого в Криніцї, ведуча містной рады в Криніцї прочітала резолуцію, котра змінить теперїшню назву уліцї, при котрій ся находить Православна церьков св. Владиміра Великого (на фотцї горї єй верьх) з ул. Цментарной на ул. св. Владиміра Великого.

 

Зміну назвы той уліцї перед пару роками пропонова владыка Паісій вєдно з настоятелём і парафіянами криніцькой парафії.

Парафія св. Владиміра Великого в Криніцї была створена декретом митрополіты Василія 1. юна 1981 р. Церьков будована в роках 1983 – 1996 а посвячена 8. септембра 1996 р. в честь св. Владиміра, Хрестителя Руси. Храм своёв архітектуров, хоць модернов, має надвязовати на тридїльны лемківскы церькви.

 

Першым парохом в Криніця быв о. митрат Василь Ґалчык (сполупрацовник радія лем.фм, автор проґраму “Церьковна гомілетіка”), а од 2006 р. криніцькых православных вірнньків веде о. прот. Петро Пупчык. Од моменту основаня парафіі дяком і діріґентом церьковного хору є Петро Трохановскый.

 

Криніцька парафія є єднов із невелёх у Польщі, в якій дакотры фраґменты Службы Божой (св. Євангелія і Апостол) чітаны суть в лемківскім языку. В церькви находит ся таблиця, написана в лемківскым языку, інформуюча о вознесіню храму в роках 1983 – 1996. (Позерай ниже.)

Северіан КОСОВСКЫЙ

Go back