Річнiця народжіня Ендія Варгола

6. авґуста 2015 была річніця народжіня Ендія Варгола – краля поп-арту русиньского походжіня (* 6. авґуста 1928, Піттсбурґ – † 22. фебруара 1987, Ню Йорк), котрого родичі еміґровали до Споєных штатів Америкы з русиньского села Микова на Пряшівскій Руси початком ХХ. ст.

Быв у своїх часах контроверзным, але і модерным умелцём. Николи не ставляв граніцї своёй творчости і іншпіраціям. Коли переставав малёвати, заоберав ся за різбов, пак рисовав, а потім продуковал філмы, выдавав часописы і музиковав. Доднесь Енді Варгол остає барз популарным умелцём, охотно выставляным на цїлым світї. Головныма інштітуціями, пошыряючіма память о ёго особі і творчости, є Музей модерного уменя Ендія Варгола в Міджілабірцях і Музей Ендія Варгола в Піттсбурґу. Окрем сталых експозіцій у лабірскім і піттсбурґскім музеях, лем того року сьме писали о выставках робот Варгола в краківскім „Музею Сучасной Штукы МОЦАК“, у културнім домі в Стропкові, образї св. Аполоніі в Кракові, або о філмах, продукованых документарістом лемківского походжіня Боґданом Дзіворьскым, ці споминах Павла Вархолы (старшого брата Ендія) і чісленных сестреніць і братранцїв, якы выросли попри славнім умелцёви, котры в документарнім філмі Стрыко Енді представлять Ебі Вархола (правнучка Ендія). Попозерайте тыж на сайт русиньского співака Ігоря Куцера, котрый модерным способом обробив і презентує піснї, співаны Улёв Вархоловов – матірёв умелця. Фурт можете їх слухати і в нашім радію лем.фм, а при нагодї – послухайте, як здравить нас сам Іґор Куцер з Пряшова.

Демко ТРОХАНОВСКЫЙ, Криніця