Посланець за Русинів – у мадярскім парламентї!
Русины Мадярьска од мая 2014 мають свого представителя у найвысшім законодарьскім орґанї – мадярьскім парламентї.
6. мая 2014 по скічіню першого закладательского засїданя парламенту Мадярьска у ёго Ґобеліновій авлї у святочній атмосферї перед председом парламенту Ласлом Кёвером, а тыж притомныма офіціалныма особами і своїма близкыма склали присягу народностны посланцї, каждый у материньскім языку, а міджі нима і русиньска народностна посланкыня Віра Ґіріц. Славностна атмосфера і прекрасны просторы парламенту зробили тот день про вшыткых притомных незабытным.
20. мая 2014 народностных посланцїв прияв председа влады Марярщіны Віктор Орбан і главный міністер канцеларії міністрів Янош Лазар. Ту ся одбыла бесїда о актуалных проблемах, котры ся тыкають народностных меншын Мадярщіны, а тыж были высловнены думкы о рахунку на будучій рік, што ся односить к фінанцованю інштітуцій народностных самосправ зо штатного фонду (ґрантового) фінанчной підпоры.
27. мая 2014 народностны посланцї ся стрітили з віце премєр-міністром Жолтом Шемєном і міністром МТР – Золтаном Балоґом. Учасници стрїчі дістали одповідї на многы поставлены вопросы односно будучности навчаня і захраны материньского языка, планы на підпорованя народностных самосправных інштітуцій, фунґованя штатного фонду фінанчной піпоры.
4. юна 2014 было закладаюче засїданя Парламетного выбору народностей Мадярщіны. Председа парламенту Ласло Кёвер на пост председы выбору меновав словеньского народностного посланця Яноша Фузіка, а на пост підпредседы – ромского народностного посланця Фелікса Форкоша. По слова ґратулацій Др. Ґерґей Ґуяш, підпредседа парламенту в дїлах законодарства, у своїм выступі зробив паралелу мїджі задачами і повинностями Законодарчого выбору і Выбору народностей Мадярьска, або о фунґованю обох выборів, в чім ся отворяють новы перспектівы у законодарстві. Закладаюче засїданя своёв притомностёв упочливила заступкыня омбудсмана одповідаюча за охрану народностных прав Др. Ержейбет Шандор...
17. юна 2014 народностных посланцїв прияв на офіціалнім обідї презідент Марярщіны Янош Адер, котрый із великым інтересом выслыхав пропозіції народностных посланцїв і дав їм ку тому много хосенных рад.
23. яюна 2014 народностных посланцїв на бесїду позвала заступкыня председы парламенту Марта Матраї. На тій приятельскій стрїчі взяв участь і председа кабінету председы парламенту Ласло Вереш. Народностны посланцї курто представили свої позіції односно окремых законодарьскых рїшінь односно приближаючіх ся волеб самосправ, дали пропозіції на злїпшіня жывота народностей.
Рената РОМАНЮК, „Русинськый світ“, ч. 107 за май – юн 2014