Сміло учме дїти азбуку

На першій лекції єврейского языка, яку єм мав почас своїх высокошкольскых штудій, сьме не робили нич. Пришов професор, каждому з нас дав штири сторінкы із ізраїльскых новинок і повів, же до далшого тыждня маєме кажду букву на вшыткых сторінках вызначіти іншов становленов фарбов. І послав нас домів. По двох денях єм мав запамятаный цїлый єврейскый алфавіт, котрый є омного тяжшый як азбука, навеце не має гласнны і так ся текст чітать омного складнїше. Простый рецепт на складный проблем. Як сьме пришли о тыждень на лекцію, професор каждому сконтролёвав задачу і потім повів: „Теперь ся можеме зачати учіти язык, бо без алфавіту, котрый є становленый про тот язык, сьме не могли робити нич.“ (...)

Нераз уж єм чув, же требы нам писати латиніков, бо молоды не знають азбуку, та холем най дашто можуть прочітати. Лемже праві тым, же будеме писати латиніков, молодым не помагаєме, але навспак. Они ани не будуть мати інтерес учіти ся азбуку, покля їм мы будеме писати латиніков. Кідь собі хтось думать, же писанём латиніков помагать, то я одкрито пишу, же не помагать, але шкодить. Азбука є омного простїша як такый єврейскый алфавіт. І хто бісїдує, же не знать і не годен ся научіти азбуку, то ся лем выгварять.Хто буде писати латиніков, жебы поміг, то помагать лем тому выгваряню і лїнивости. І помагать тому, жебы молоды люде зостали одрізаны од далшого русиньского світа, ёго літерартуры, пресы, бо тот світ всядыль хоснує азбуку. На тот „складный“ проблем навчаня азбукы ємного простых рецептів, Наприклад і взяти русиньскы новинкы і кажду букву собі вызначіти іншов фарбов. Не глядайме выгварькы, а сміло учме дїти (позн. ред.: русиньску) азбуку. Без того, жебы знали азбуку, не будуть годны знати нич з языка.

Петро МЕДВІДЬ, ІнфоРусин