Друга книжка гаданок у русиньскім языку

З выдавательства Академії русиньской културы в Словеньскій републіцї в тых днях вышла нова книжка русиньскых загадок під назвов Здогадай, школярику в авторстві Юрка Харитуна, котра є по книжцї Три раз гадай Гелены Ґіцовой-Міцовчіновой друуга книжка гаданок про дїти в русиньскім языку.

 

Знамый русиньскый поет Юрко Харитун із Кежмарку, інакше родак із русиньской Стружніцї, Сниньского окресу, дотеперь выдав 5 зборників поезій в русиньскім языку: Гуслї з  явора (Пряшів: Русиньска оброда, 1995), Мої жалї (Пряшів: Русин і Народны новинкы, 2010), Мої сны (Пряшів: Сполок русиньскых писателїв Словеньска, 2011), Мої незабудкы (Пряшів: СРПС, 2013) і Мої надії (Пряшів: Академія русиньской културы в СР, 2014). В тых зборниках централнов є тема жалю за роднов Стружніцёв, котра была выстїгована про ставбу гатї в Стариньскій долинї. Але в ёго поезії ся обявують і общі русиньскы патріотічны мотівы, мотівы природы і любовны мотівы. За свою дотеперїшню творчость быв оцїненый уж трёма преміями – міджінароднов Преміов Александра Духновіча за русиньску літературу од Карпато-русиньского научного центра в Америцї і Преміов Александра Павловіча, котру му уж двараз удїлив Літературный фонд у Братїславі.

Здогадай, школярику – то перша книжка aвтора присвячена дїтям. Книжка є повна ілустрацій малярькы русиньского походжіня Анны Ґаёвой, котра ілустровала наприклад і русиньскы учебникы про основны школы.

П. М.

Go back