На архієпархіялнім одпустї в Лютинї посвятили нову деревяну Церьков Святой родины
Тогорічне архієпархіялне одпустове свято Успіня Пресвятой Богородіцї в Лютинї в днях 22-го і 23-го авґуста 2015 по традічнім посвячіню воды зачало посвячінём новой деревяной ґрекокатолицькой Церькви Святой родины, кора є збудована подля автентічного храму, котрый стояв в Лютинї перед сучаснов Базіліков мінор і згорів у 1908 роцї. Нова церьков з выглядковов вежов стоїть на скалї в ареалї базілікы і буде тырвалов споминов на Рік родины, котрый ся вже почас другого календарьного рока святкує в Пряшівскій ґрекокатолицькій архієпархії.
З думков збудовати тот храм пришов пряшівскый архієпіскоп і митрополіта Словакії высокопреосвященый владыка Ян (Бабяк, ТІ), котрый церьков і посвятив. На посвячіню быв участный і торонтьскый єпархіялный єпіскоп про Словаків жыючіх у Канадїпреосвященый владыка Джон (Пазак, CSsR). Так само была посвячена і нова Крестна дорога і Путь світла, котра веде попід лїс од базілікы на лютиньску гору і творить єй сім двокаплічок.
Проґрам одпусту продовжовав вечернёв архієрейсков святов літурґіов в базіліцї Успіня Пресвятой Богородіцї, котрой головным служытелём быв братїславскый єпархіялный єпіскоп преосвященый владыка Петер (Руснак) і вєдно з ним служыли і высокопреосвященый владыка Ян і преосвященый владыка Джон. Пряшівскый архієпіскоп і митрополіта в проповідї повів, же в Ґрекокатолицькій церькви на Словакії є Успіню Пресвятой Богородіцї присвяченых 54 церьквей, і же доґма о Нанебевзятю Пречістой Дівы была наформулована на основі теолоґічной пропозіції ґрекокатолицького священика проф. Миколая Руснака.
Проґрам далше продовжовав через цїлу ніч і в базіліцї, і на лютиньскій горі. Ёго частями были головно святы літурґії, побожности, катехезы, проґрам про дїти, всеночне бдіня, котре одправляв єпіскоп помічник пряшівской архієпархії преосвященый владыка Мілан (Лах, ТІ) ці промітаня філму. Порґрам мав свою завершалну часть в недїлю святочнов архієрейсков літурґіов на лютиньскій горі. Головным служытелём быв пряшівскый архієпіскоп і митрополіта Ян і вєдно з ним служыли гайдудорозькый архієпіскоп і митрополіта Мадярьска высокопреосвященый владыка Філіп (Кочіш), торонтьскый єпархіялный єпіскоп преосвященый владыка Джон (Пазак), кошыцькый єпархіялный єпіскоп преосвященый владыка Мілан (Хаутур, CSsR), братїславскый єпархіялный єпіскоп преосвященый владыка Петер (Руснак), єпіскоп помічник преосвященый владыка Мілан (Лах, ТІ) і емерітный єпіскоп помічник празькый преосвященый владыка Іоан Євґен (Кочіш). Вєдно з нима і много священиків.
На лютиньскій горі путників несподівало нове перекрытя літурґічного простору, котре іщі не є докінчене, і зреконштруована і розшырена будова за літурґічным простором. Як повів владыка Ян на кінцю святкованя, вшытко, што в Лютинї робить ся, діє ся про благо путників, жебы ся на тім путницькім місцї чули добрї і мали вшытко, што путник потребує, жебы ся там все духовно укріпили.
Путници загнали із Лютьны телеґрам папови римскому Франтїшкови із убеспечінём о молитвах за нёго, і просьбов о благословлїня.
П. М.
(Жрідло: grkatpo.sk, оброблене і корочене.)