(не)Очекованы успіхы

Кідь ку кінцю марцa проходила в Баньскій Быстріцї стріча представителїв Русинів і неіснуючой народности „Русинів-Українцїв“, быв єм остро проти той стрїчі і крітіковав єм як то, же была, так і резултаты той стрїчі. З участных за Русинів публічно втогды признав, же іти на стрїчу было хыбов, лем председа Округлого стола Русинів Словеньска Андрій Ліґа. Останї то брали як великый „успіх“. Докінця, же тов стрїчов нас властно узнали.

 

На то, жебы не іти на таку стрїчу было веце причін. По перше, Уряд уповномоченого про народностны меншыны і етнічны ґрупы маніпуловав у тій справі, бо і на своїм сайтї, і у позванях про обидві стороны той стрїчі, писав, же стрїча є ініціована на основі того, же сьме таку стрїчу жадали. Лемже таку стрїчу нихто не жадав. Мінімално з русиньского боку. Представителї Русинів жадали рїшіня вопросу єствованя орґанізації Союз Русинів-Українцїв Словацькой републікы, котра репрезентує неекзістуючу народность і продовжує в українізації русиньского жытельства на Словакії. Стрічу, намісто рїшіня того вопросу, ініціовав сам Уряд уповномоченого, жебы єлеґантно збыти ся проблему, якый Русины одкрыли.

 

По друге, сісти собі за єден стіл з орґанізаціов, о котрій пишеме, же бы не мала єствовати, бо не є народности Русин-Українець, є з мого погляду леґалізаціов той орґанізації. Давати з нёв даяке сполочне выголошіня, то вже кошмарь, із котрого нас іщі довго може болїти голова. Русиньскы орґанізації не мають проблем зо жаднов іншов народностнов меншынов, ани зо жаднов орґанізаціов іншой народностной меншыны. Так само бы представителї Русинів не мали проблем їднати о даякых сполочных справах ани з україньсков орґанізаціов. Лемже Союз не є україньсков, а українізачнов орґанізаціов, котра продовжує в роботї зачатій за комунізму. Но, як єм писав, участны стрїчі в Баньскій Быстріцї брали стрїчу як успіх. Зато посмотьме ся на успіхы стрїчі, котры єм міг прочітати в остатнїх днях.

 

В найновшім выданю „Вісника СФУЛО” 06-08/2015 пише ся окрім іншого о тім, же почас 61-го річника фестівалу у Свіднику, якый орґанізує Союз Русинів-Українцїв, проходило і засїданя презідії „Світової Федерації Українських Лемківських Об’єднань“ (СФУЛО). Основныма темами были подля статї скаржіня ся Союзу, котрый є неспокійный, же словацька влада не хоче узнати „Русинів-Українців“, або і, цітую, „аґресівна“ позіція русиньскых орґанізацій до вопросу „Русинів-Українців“. Также дожадованя ся того, жебы кідь хотять быти Українцями, най будуть україньскым союзом і занимають ся Українцями, є з нашого боку аґресівне. Неаґресівне є то, же Софія Федина, котра была у Свіднику так само участна, писала за СФУЛО по Світовім конґресі Русинів у 2013 роцї одкрыте писмо, де жадала, жебы „Служба беспеки України“ контролёвала Русинів і їх діятельство. Но і кідь ся Союз скаржыть, же не суть узнаны Русины-Українцї, то ся треба задумати над тым, як нас властно стрїчов у Быстріцї „узнали“.

 

Другым успіхом стрічі є статя, котра была публікована на сайтї „Закарпаття онлайн“. Пише о тім, же была зліквідована остатня інтернатна основна школа з україньскым навчалным языком в Гуменнім. В тій статї непідписаный автор підкреслює, же на ліквідації школы брало участь „радікалне крыло русиньского руху“. Статя была публікована і на сайтї „Українці Словаччини“, де є підпис „-мі-“. Не знам, хто має быти радіклалне крыло русиньского руху, але смішно мі є з того, же о радікалізмі пише якбач хтось із кругу Союзу Русинів-Українцїв, орґанізації, котра є членом СФУЛО, той федерації, котрой голова Софія Федина прославлять бандерівцїв. Ани єдна русиньска орґанізація на Словакії ку жадному радікалізму не голосить ся і жадных бандітїв не прославлять. Уж ани не бісїдую о тім, же жадна русиньска орґанізація не має вплив на єствованя ці неєствованя україньскых школ. Навспак, не знаме просадити ани то, жебы нам на тых школах доволили учіти русиньскый язык. Бо тот, хто досправды має вплив на школы, хоць бы не мав мати, бо є лем обчаньскым здружінём, то є Союз Русинів-Українцїв. Є то лем їх вина, же не знають здобыти дїти, котры бы ішли на україньску школу. Но легше вину звалити на іншого, як собі признати то, же сьме уж помалы неспособны до ничого і кінчіме.

 

Удяд уповномоченого собі зробив стрїчу в Баньскій Быстріцї і тым є про урядників наша пожадавка, жебы не міг єствовати Союз неекзістуючой меншыны, вырїшена. Українізаторы ся можуть дале сміяти над тым, як елеґантно вышли із того проблему – стачіла єдна стрїча і будуть мати зясь на даякый час покій. Докінця ся можуть пустити до далшых атаків на Русинів. Но і мы, мы ся можете „тїшыти з успіхів стрїчі“, і дуркати собі по голові, же сьме таку хыбу зробили і сіли собі з нима за єден стіл.

 

(Статя была написана як коментарь „Вступне до контроли“ лемківского радіа lem.fm)

Петро МЕДВІДЬ

Go back