На Словакії до Днїв европской културной дїдовизны залучены і деревяны церькви

Од 11-го септембра аж до 20-го септембра 2015 р. проходили Днї европской културной дїдовизны – European Heritage Days. До тых днїв залучать ся і Словакія од 1993 року. Подію орґанізує Рада Европы і Европска комісія і проходить у 49-ёх державах.

В Словацькій републіцї коордінатором події є Здружіня історічных міст і сел на Словакії. Тогорічнов темов Днїв европской културной дїдовизны є „Бісїда памяток“. Як інформовав денник Korzár Рудолфом Гренём за Пряшівску ґрекокатолицьку архієпархію, цілём днїв є сприступнити людям културны памяткы, ці вже тоты, котры суть нормално заперты, або котры служать на іншы заміры. На северовыходї Словакії люди можуть посмотрити собі дїдовизну Русинів – унікатны деревяны церькви.

З деревяных церьквей було мож до 20-го септембра 2015 року відїти наприклад храмы в Трочанох, Яловій, Калній Розтоцї, Ладомировій, Доброславі ці Лукові-Венеції. Ближшы інформації можете найти на сайтї Днїв европской културной дїдовизны.

 П. М.