Засїданя Світовой рады Русинів і Світового форуму русиньской молодежи

В днях 19. і 20. септембра 2015 р. в селах Стары Янковцї і Петровцї в Хорватьскій републіцї попри засїданю Світовой рады Русинів, проходило засїданя Світового форуму русиньской молодежи.

Почас засїданя была бісїда м.ін. о планах орґанізованя сполоченьскых подій так, жебы Русины з різных держав мали нагоду частїше ся стрїчати і познавати. Вечур быв културный проґрам під назвовКоли голубіця летїла, почас котрого выступили м.ін. ансамблїРутенія зо Словакії, Фатёвы з Підкарпатьской Руси ці ґрупа Ґереґовцї, тыж зо Словакії, яку веде Іван Чіжмар, і іншы співакы зо Словакії, Румунії і Хорватії.

Стары Янковцї, де проходило засїданя, то єдна з першых місцевостейу Хорватії, вєдно з Вуковаром, Ілоком ці Петровцями, в якій оселяли ся Русины на початку ХІХ. ст. Скорше, бо іщі в половинї XVIII. ст., Русины оселяли ся на обшарї Войводины (Руськый Керестур, Коцур і іншы). Была то колонізаційна акція заселяня южных польногосподарьскых земель австро-мадярского цісарьства. Окрем Русинів, путовали там тыж нїмецкы, словацькы і угорьскы жытелї.

Наталія МАЛЕЦЬКА-НОВАК

Go back