До лику святых записана Русинка
4. oктобра 2014 р. в Нюарку (коло Ню Джерсі) выголосили за блажену сестру Міріям Терезію Демяновічову з Конґреґації милосердных сестер св. Єлизаветы. Сестра Міріям была дівков русиньскых ґрекокатолицькых еміґрантів із Бардеёва, днесь Словацька републіка. Русины так мають далшого чоловіка записаного до лику святых.
Тереза Демяновічова ся народила 26. марца 1901 року в Беёнї, штатї Ню Джерсі в Споєных штатах америцькых, як наймолодша із семеро дїтей родичів Александра Демяновіча і Йоганы, з дому Сухой. Похрещена, миропомазана і причащана была у візантійскім обрядї родічів. Середню школу скінчіла в 1917 роцї. В тім часї ся хотїла стати кармелітанков, але мала хвору мати, также зістала дома, жебы ся могла о ню старати. По тім, што мати умерла на хрипкову епідемію в 1918 роцї, Тереза наступный рік зачала штудовати на высокій школї. Заміряна головно на літературу здобыла в роцї 1923 діплом з вынятковыма резултатами.
Все єй але тягло ку жывоту в монастырї. Так в роцї 1925 вступує до монастыря Конґреґанції милосердных сестер св. Єлизаветы. Сестра Міріям, і кідь вступила до римокатолицькой конґреґації, зохабила собі свій выходный обряд по родічах. Вже як послушніця вызначала ся інтензівнов духовностёв, яка была основана на містічной скушености общіны Святой Тройци і то аж до такой міры, же єй называють „америцьков святов Терезков од Дїтины Ісуса.“ Сестра Міріям умерла 8. мая 1927 року, лем 26-річна, по тім, што была оперована за запал апендіксу. Была похована на Цінтерї св. Родины монастыря Милосердных сестер св. Єлизаветы. Напрік свому куртому жывоту, вызначала ся великов святостёв жывота. І напрік тому бы може доднесь не была выголошена за благоречену, кібы не пришов рік 1964 і з ним повязане чудотворне выздоровлїня, яке є приписане якраз сестрї Міріям.
Втогды вісемрічный хлопець Майкл Менцер слїпнув. Мав деґенарачну хвороту, котра постигує очі і способує страту централного віджіня. В часї, кідь его мати страчала надію, Майкл дістав од учітелькы мощі монашкы – образок і волося. Сам, днесь 54-річный муж споминать, як докторы повіли мамі, же за пів рока ослїпне. Він але надіяв ся, же вшытко буде іншак. Раз сам выбрав ся домів, і кідь уж цкоро не відїв. Посмотрив ку сонцю і очі го зразу перестали палити. Кідь попозерав долов, ясно увідїв волося сестры Міріям, котры довтогды негоден быв ясно відїти. Од того часу ниґда не мав проблемы з очами.
Сестра Міріям є першов америцьков монашков, котра є записана до лику святых Католицькой церькви. Нас тїшыть, же є далшым святым чоловіком, котрый вышов із русиньского народа.
Мґр. Петро МЕДВІДЬ, Пряшів