70 років по нашому

В 2015 роцї Заслуженый академічный закарпатьскый народный хор святкує 70. річніцю од свого основаня. Од самого початку мав у своїм репертоарї русиньскы співанкы, танцї і фолклорістічны представлїня, цїлы сценкы – образы з традічныма русиньскыма обрядами, як Бал в старім селї, Винобраня і Кычерка.

 

Іншпіраціов цїлой творчости хору, орхестра і танечной ґрупы є фолклор Підкарпатьской Руси. За період свого дїятельства ансамбель выпустив велё награных співанок і представлїнь на платнях, котры зрїдка, за комуністычных часів, доходили і до Польщі, до розсїяных світом Лемків. Потїшали они выгнаных людей, котры слухали “закарпатськи” співанкы і зачудованы нараз здогадовали ся,же то они по нашому.

 

В сердцюміста Ужгорода – в областній філгармонії є місце, де мать свої репетіції ансамбель, котрый творять солісты, хор, прекрасный орхестер народных інштрументів і танцюрісты. Там же 18. октобра 2015 од 17.00 год. (за україньскым часом) одбыв ся святочный концерт з нагоды 70. річніцї основаня Заслуженого академічного закарпатьского народного хору.

Концерт вели: умелецька ведуча ансамблю, заслужена працовнічка културы Україны  – Наталія Петій-Потапчук, Наталія Делеган і знамый слухателям радія ЛЕМ.фм поет і співак – Василь Матола. В проґрамі звучали творы із золотого фонду ансамблю, як і новы композіції і проєкты.

 

Боґдан ҐАМБАЛЬ

Go back