Вольбы в Сербії

Остатня недїля 26. окробра 2016 была волебна. А нелем на Українї. В недїлю проходили і вольбы до тзв. Націоналного совіту в Сербії (позн. ред. Народной рады Русинів). Своїх новых посланцїв выберали і Русины.

Новых посланцїв до Націоналного совіту могло волити 8 270 Русинів, котры ся дали записати до окремого списку народностных воличів. В недїлю голосовало 3 317 із них, што значіть, же вольбы мали міджі Русинами 40-процентну участь. Русины волили 19 посланцїв і могли собі выберати із 7-ёх кандідачных списків. Вшыткы кандідачны спискы здобыли мандаты.

Список під назвов „Вєдно за Руснацох – Славко Рац“, котрый творили представителї Демократічной партії і прихылніцї Союзу Русинів-Українців, здобыв у вольбах 5 мандатів і став ся найуспішнїшым. Такой по нім слїдовав кандідачный список з назвов „Руска лиґа – Олена Папуґа“, котрого кандідати представлюють Соціалнодемократічну ліґу Войводины і сполупрацують з русиньсков орґанізаціёв Руска матка, значіть суть ту заступцёве русиньского напряму. Тот список здобыв 4 мандаты. На третім місцї скінчіла кандідатура „За Руски Керестур – Желько Ковач“, котра здобыла 3 мандаты. Суть то кандідаты Демократічной партії, проукраїньскы орьєнтованы. Три маднаты здобыла і кандідатура під назвов „Я Руснак“, тоты мандаты можеме раховати за прорусиньскы мандаты. З двома мандатами скінчіла „Руска инициятива – Микола Шанта“, котра є проукраїньскы орьєнтована. Представителї форуму молодых Руской маткы, котры кандідовали під назвов „Млади за будучносц“ здобыли єден мандат, єднако як список „Руска младеж“. В новім націоналнім совотї так буде 19 членів, з котрых 10 мандатів буде мати проукраїнске крыло, 8 мандатів прорусиньске і 1 мандат є на тот час невыпрофілованый.

Націоналный совіт є найвысша форма народностной самосправы в Сербії. Фунґує од 2002 року.

 Петро МЕДВІДЬ