На Червеній ружі передана премія Лемкови

22. октобра 2014 р. проходив шторічный фестівал русиньской културы під назвов Червена ружа, котрый орґанізує Народна рада Русинів Закарпатя. Тота зъєдинять 15 русиньскый орґанізацій, котры діють на теріторії Закарпатьской области Україны.

Фестівал традічно проходив у Закарпатьскім областнім руськім драматічнім театрї в Мукачові. У проґрамі взяло участь веце як 20 умелецькых колектівів і солістів зо Закарпатьской области. Праздник підкарпатьскых Русинів одкрыли председа Народной рады Русинів Закарпатя Євген Жупан, ведучій оддїлїня културы Областной державной адміністрації Юрій Глеба, ведучій оддїлїня народностей і реліґій Областной державной адміністрації Анатолий Салай, котры поздравили вшыткых участных. Міджі выступаючіма были такы колектівы, як дїтячій ансамбель Бабчина співанка, народный вокалный ансамбель народной співанкы Цінторія, ансамбель Ужанка, мужскый народный ансамбель Карпатьскы голосы і далшы.

В рамках фестівалу председа Народной рады Русинів Закарпатя Євген Жупан передав і Премію Александра Павловіча. Тогорічным лавреатом став ся за свою довгорічну творчость русиньскый писатель Йосиф Лемко.

„Я стихы не люблю, лем слова, котрі были первыми уд них,“ такыма словами зачінать єден із своїх стихів днесь сімдесятьсімрічный Йосиф Лемко. Писатель і русиньскый діятель народив ся 13. авґуста 1937 року коло Хуста в Бороняві на Підкарпатьскій Руси, яка втогды належала Чехословакії. Учів ся в Боронявскій школї, пізнїше закінчів Хустьске културно-освітнє технікум і Харківскый інштітут културы. Служыв в армаї, учітелёвав, робив у Областнім домі умелецькой творчости. Од 1994 року аж до одходу на пензію Йосиф Лемко быв ведучім оддїлїня кадрів і общых вопросів реґіоналного оддїлїня „Фонда госимущества“ Україны в Закарпатьскій области. Быв нагородженый металями „Ветеран труда“ і „Знак пошани“. Од 1990 до 1993 року быв депутатом Закарпатьской областной рады.

Йосиф Лемко діє в русиньскых орґанізаціях на Підкарпатю. Мож го спомянути як члена презідії Народной рады Русинів Закарпатя, є членом веджіня Ужгородьского културно-освітнёго общества Александра Духновіча, членом веджіня Союзу русиньскых писателів Закарпатя, але участь бере і в нерусиньскых орґанізаціях. Є членом Сполку журналістів Україны ці народной Ліґы композіторів Україны. За свою творчость вже быв перед дакілько роками нагородженый як лавреат і областнов Літературнов преміёв Александра Павловіча.

З ёго богатой творчости мож спомянути такы збіркы стихів,  як „На сивих крилах горлиці“, „Отча земля“, „Заспівайме в’єдно“, „Коса на ліву руку“, „Ключ од любови“ і далшы. Йосиф Лемко є і автором многых співанок.

Петро МЕДВІДЬ