Одбыв ся 31. семінар карпаторусиністікы

21. октовбра 2015у засїдалнї Consilium maius Пряшівской універзіты одбыв ся далшый научный семінар карпаторусиністікы, якый уже по 31. раз орґанізовав Інштітут русиньского языка і културы на ПУ. На семінарі зо своёв інтереснов лекціёв під назвов Перша світова война, Русины і взник Чеськословеньска в роцї 1918 выступив проф. ПгДр. Петер Шворц, к. н., з Катедры нововікой і найновішой словацькой історії Інштітуту історії Філозофічной факулты Пряшівской універзіты в Пряшові.

Проф. Шворц ся у свої професії занимать господарьсков і політічнов історіёв Ческословеньска із орьєнтаціов на єй соціалны і народностны неприязны резултаты, дале на проблематіку історії Підкарпатьской Руси в роках 1918 – 1946, середнёевропску історію 20. стороча з орьєнтаціов на народностну проблематіку, етноідентіфікачны процесы і церьковну історію. Темі Підкарпатьской Руси присвятив дакілько своїх публікацій. В рамках свого реферату слухачам принїс много інтересных інформацій з архівных документів, ку якым ся при своїх баданях дістав. Приближыв, з якыма концепціями робили русиньскы представителї і з кым о тій проблематіцї діскутовали. Треба повісти, же історічны темы суть все актуалны і все повны новых інтересных інформацій.

На конець были Мґр. Валеріом Падяком, к.н., курто представлены найновшы публікації з карпаторусиністікы, котрых од остатнёй презентації вышло немало. З одборной літературы міджі нима были напр. 7 высокошкольскых учебникы выданы Інштітутом русиньского языка і културы, найновшы словникы Ю. Чорія ці русиньско-славяньскый лексікон М. Алмашія. З красной літератури были міджі іншым представлены і дві публікації про дїти, якы того року выдала Академія русиньской културы в СР.

Цїлый семінар і заключну діскузію традічно вела ПгДр. Кветослава Копорова, ПгД., котра авізовала і далшый семінар карпаторусиністікы дня 4. новембра 2015, на якый Вас сердечно позываме. Бісїдовати ся буде о Русинах а їх поставлїню на Українї.