Русин Юрій Штенё – новый декан лїкарьской факулты

Лїкарьску факулту Універзіты Коменьского в Братїславі поведе Русин. У вольбах о тім вырїшыв Академічный сенат Лїкарьской факулты УК 28. октобра 2014. До функції нового декана, котрый буде мати свій функчный період од 1. фебруара 2015 р. аж до 31. януара 2019 р., быв звоелный проф. МУДр. Юрій Штенё, др. н., котрый дотеперь дійствовав як предноста Невролоґічной клінікы Універзітного шпыталю в Братїславі.


Успішный і вызначный неврохірурґ Юрій Штенё є родаком із русиньского села Кленова, Сниньского окресу. Ёго брат Михал є зясь вызначным ортопедом і довгорічным председом Здружіня інтеліґенції Русинів Словеньска. Ю. Штенё закінчів основну школу в родній Кленовій, ґімназію абсолвовав уж Братїславі. В роцї 1966 зачав штудовати на Лїкарьскій факултї Універзіты Коменьского в Братїславі, котру закінчів у 1972 роцї. О три рокы пізнїше, в 1975 роцї, наступив на 4 рокы на Екстерну ашпірантуру на Бурдєнков неврохірурґічный інштітут в Москві. Окрем того абсолвовав і много далшых штудійных стажіву Нїмецьку, Швайцарії, Словенії і в Споєных штатах Америкы.

Юрій Штенё од 1972 року аж доднесь робить на Неврохірурґічній клініцї Лїкарьской факулты Універзіты Коменьского в Братїславі. Окрем того быв роках 1972 – 1974 секундарным доктором в Інштітутї народного здоровя міста Братїслава, в роках 1974 – 1977 дійстовав як асістент- неучітель на Лїкарьскій факултї УК і од року 1977 быв на тій школї десять років одборным асістентом. Од 1987 року є доцентом спомянутой факулты, а од року 2002 є ту професором. Предностом клінікы ся став у 1992 роцї.

Штенё є автором многых фаховых статей, выступав зо своїма лекціями на многых конференціях і быв членом дакілько науковых рад, редакчных рад і комісій. Выховав уж і своїх докторандів. Много раз быв за свою роботу оцїненый фаховов публіков дома і за граніцями. З домашнїх, словацькых оцїнїнь, мож спомянути Хрест князя Прибіны 1-ой класы за розвиток неврохірурґії, котрый здобыв в 2007 роцї од презідента Івана Ґашпаровіча. Прибинів хрест – то словацька медайла, котру передавать презідент на пропозіцію словацькой влады або парламенту. Удїлює ся жытелям Словацькой републікы, котры ся вызначно заслужыли о господарьскый, соціалный або културный розвиток републікы. Має три класы, з чого 1-а класа є найвысша. Медайла ся удїлює все з нагоды выроча взнику Словацькой републікы.



Петро МЕДВІДЬ

Go back