• Aкадемія
  • Новинкы • 46/2015
  • Рада влады схвалила оцїнюючі справы. Російскый і сербскый языкы бы мали быти на Словакії меншыновыма

Рада влады схвалила оцїнюючі справы. Російскый і сербскый языкы бы мали быти на Словакії меншыновыма

Рада влады про людьскы права, народностны меншыны і родову рівность Словацькой републікы в октобрї 2015 р. на своїм 22-ім засїданю схвалила Оцїнюючу справу о підпорї култур народностных меншын за 2014 рік, Справу о ставі народностного школства за 2014 рік і Справу о хоснованю языків народностных меншын за 2014 рік. Інформує о тім інтернетовый сайт повіреной задачами уповномоченого про народностны меншыны і етнічны ґрупы.

Тоты справы шторік в змыслї Штатуту Выбору про народностны меншыны і етнічны ґрупы робить выбор і предкладать їх на схвалїня радї. На написаня оцїнюючіх справ за 2014 рік была зряджена Дочасна робоча ґрупа, в зложіню якой было 13 представителїв народностных меншын (на Словакії є 13 офіціално узнаных народностных меншын) і 8 представителїв штатной справы.

Членкы і членове Дочасной робочой ґрупы, котры были представителями штатной справы мали можность окремы справы припомінковати як з погляду предметного, так ай одборного. Многы із припомінок были, подля інформації на сайтї,членами Дочасной робочой ґрупы, котры заступали народностны меншыны, акцептованы. Тоты припомінкы творять додаткы окремых справ. Оцїнюючі справы одзеркалюють погляды їх авторів, то значіть, представителїв за окремы народностны меншыны і мапують найважнїшы актівіты в области културы, языка і школства за 2014 р.

В рамках 22-го засїданя рады была обговорена і Пропозіція на признаня російского і сербского языків за меншыновы языкы в Словацькій републіцї в змыслї Европской харты реґіоналных або меншыновых языків, котра была резолуціов схвалена. Вєдно з тым было резолуціов рекомендоване владї Словацькой републікы схвалити таку пропозіцію, жебы тоты языкы были на Словакії браны як меншыновы.

Процес залучіня російского і сербского языків до языковой харты ініціовав Уряд уповномоченого влады Словацькой републікы про народностны меншыны по схвалїню на їх залучіня выбором  іщі у 2012 роцї. Уряд уповномоченого в тій справі ословив 10 резортів зо жадостёв, жебы дали свої пропозіції, зробив веце їднань із релевантныма субєктами і зреалізовав далшы крокы про успішну фіналізацію цїлого процесу.

Петро МЕДВІДЬ

Go back