ПУЛЬС (ПУНА) святкує 60 років

Піддукляньскый умелецькый людовый субор (ПУЛЬС – ПУНА) того року святкує 60 років од свого основаня. Із той нагоды на 11-го децембра 2015 р. приготовив новый премєровый проґрам, котрым собі тот вызначный юбілей припомяне. Проґрам ся одбуде о 18.30 год. на Великій сценї Театру Йонаша Заборьского в Пряшові.

ПУЛЬС є єдиным русиньскым професіоналным колектівом і выникнув у 1955 роцї в Пряшові (втогды як україньскый ансамбель) з цїлём сценічно реалізовати і шырити вокално-музичне і танечне богатство Русинів і Українців. В колектіві, котрый творять три части – танечна, співацька і музична – робить веце як 40 умелцїв.

Драматурґія ПУЛЬС-у ся зосереджує в першім рядї на традіції Русинів, жыючіх на выходї Словакії, але таксамо на фолклор остатнїх реґіонів Словеньска, котрый ся колектів намагать перекомпоновати до высшой сценічной подобы. У своїм репертоарї мать ПУЛЬС і танцїі з навколишнїх країн. ПУЛЬС є унікатным тїлесом, што можеме відїти на ёго выстулїнях, у котрых є зображена сила гордого натурелу, яка ся зъєдинять із выбрушеным чутём про поетіку. Концерты ПУЛЬС-у суть повны емоцій, ідейно богаты, їх участник ся може нелем одреаґовати, але тыж начерьпати множество позітівной енерґії.

За часів богатой історії ся у колектіві ПУЛЬС вычеряло веце як 500 професіоналных умелцїв. Многы з них у своїй карьєрі продовжовали в іншых колектівах на Словакії, або і за ёго граніцями. Бывшы „пульсаци“ ведуть аматерьскы колектівы, або як педаґоґы присвячують свій час выхові молодой умелецькой ґенерації.

Од свого выникнутя ПУЛЬС абсолвовав веце як десять тісяч выступлїнь дома і десяткы концертів за граніцями Словакії. Аплавдовала му публіка в Анґлії, Булгарії, Данії, Франції, Голандії, Югославії, Канадї, Норвеґії, Польщі, Австрії, Нїмецьку, Швайцарії, Італії, Тунісї, США і в країнах бывшого СССР.

П. М.