Русиньскый „MED‟

• Часть забавляючіх ся штудентів на третій акції штудентьской телевізії Медіялка, котрa былa присвяченa русиньскій културї, языку і забаві.

Під таков назвов проходила 9. новембра 2015 акція інтернетовой штудентьской телевізії Медіялка, яка дїє в рамках Пряшівской універзіты. „MED‟ (media-education-disco) є новый формат ТВ Медіялка, якый капчать забаву з освітов. Третїй „MED‟ быв якраз заміряный на русиньску културу, русиньскый язык і русиньску забаву.

 

Орґанізаторы приправили богатый проґрам, в якім выступив напр. музикант Ян Єндриховскый і часть фолклорного колектіву Ториса. Про гостїв были приправлены і змаганя заміряны на переклад выбраны русиньскых словічок і  переклад русиньского белетрістічного тексту. Участь в телевізній діскузії з модераторками Міхаелов Жумаровов і Вікторіов Ковачовов на русиньскім „MED-ї‟“ брали і директор ТАД – Маріан Марко, герцї ТАД – Евґен Либезнюк, Ладїслав Ладомиряк і Михал Ільканин, Зденка Цітрякова з ІРЯК ПУ ці Давід Палащак з катедры історії ПУ.

 

Цїла акція ся одбывала в пряшівскім штудентьскім барї Дежа-Ву вечур, за великой участи молодых людей, якы тоту нетрадічну акцію не могли выхабити. На русиньскім „MED-ї“ ся забавляло, співало і танцёвало аж до пізных ночных годин, так, як то у нас на забавах ходить.

 

Мґр. Зденка ЦІТРЯКОВА, інтерна докторандка ІРЯК  ПУ

Go back