Рутенія буде святковати з „русиньскым сердцём“

Минать 5 років одколи быв зачатком 2010 року основаный і першыраз 23-го октобра 2010 р. выступав зо своїм проґрамом ансамбель Рутенія (Ruthenia).То русиньскый фолклорный колектів, дїючій в Братїславі, котрый ся замірює на репрезентованя русиньской народностной меншыны. Названя ансамбель має од історічной назвы теріторії, на котрій жыли Русины (marchia Ruthenorum), што має вказати на то, же молоды люде не стратили інтерес о свою історію.

Ансамбель Рутенія із нагоды 5-ой річніцї свого выникнутя приготовлює свій новый проґрам під назвов Русиньске сердце. Ёго святочна премєра буде дня 28-го новембра 2015 р. о 18.00 год. в Домі културы Zrkadlový háj в Братїславі.

Русиньске сердце – то повіданя о приятелях дротарях, котры пережывають інтересны жывотны сітуації в різных частях северовыходной Словакії, но і в Сербії. По премєрї проґраму буде  забава із гостём, народнов музиков Железіяр – Музиков Мілана Рендоша. Гостём проґраму буде і Михал Ноґа, котрый вєдно із народнов музиков Рутенія одограть цїлый проґрам.

Веце інформацій о тікетах і цїнї вступного найдете ту.

 П. М.