Юбілуючій довгорічный лемківскый актівіста
Андрій КОПЧА із Вроцлаву в Польщі одсвятковав недавно свій округлый жывотный юбілей – 60 років од свого народжіня. Він належыть міджі довгорічных лемківсках актівістів, ведь і я го в тій ролї познам од 1991 року, коли сьме ся спізнали на 1. засїданю Світового конґресу Русинів (СКР) у Міджілабірцях на Словакії. Він быв председом першой русиньской орґанізації в Польщі під назвов Стоваришыня Лемків, котра того року славить 25 років од свого заложіня, а од тогды доднесь він стоїть на челї той орґанізації. Пізнїше сьме ся спорадічно стрічали на засїданях Світового конґресу Русинів або на засїданях єй выконного орґану – Світовой рады Русинів (СРР), котрой тыж є од зачатку, як єдиный, аж доднесь єй членом, а я быв довгы рокы выконным секретарём СРР. Єден двойрічный період быв і председом СРР, коли го зволили до той фукції у нас, у Пряшові, на засїданю СКР, праві по моїм двойрічнім председованю у тім орґанї. Так само спорадічно сьме ся стрічали на їх орґанізаціов приправованых Міджінародных біенале лемківской/русиньскоїй културы в польскій Криніцї. Стрічали сьме ся і на далшых славностных подіях, котры орґанізовала тота котра членьска орґанізація СКР у своїй країнї. Але то вшытко были офіціалны і робочі стрічі, также о Андріёви не можу ся шырше росписати, кідь єм го знав лем з высше повідженого, зато сьме выужыли коротку статю з „Енциклопедії історії та культури карпатських русинів“ зоставителїв-професорів П. Р. Маґочія і І. Попа (Ужгород: Видавництво В. Падяка, 2010, стор. 361).
А. З.
***
Копча Андрій (Kopcza Andrzej) (нар. 10. 9 1954, Польща) – театралный режісер, драматурґ, културно-освітный діятель русиньской народностной орьєнтації міджі Лемками в Польщі. А. Копча народив ся в родинї Лемків, насилно переселеных по другій світовій войнї на запад Польщі, де він жыє і дотеперь. Скінчів Вроцлавску універзіту (1977) і Державный інштітут кінематоґрафії, театру і телевізуії в Лоджі (1984). Одтогды робив як директор Театру Санявского, перше в містї Валбжіх, а потім – у Вроцлаві.
А. Копча быв міджі сполузакладателями Стоваришыня Лемків (1989 – ). Быв режісером аматерьского театру той орґанізації, про котрый написав дакілько пєс лемко-русиньскым языком, зображуючі судьбу свого народу у першій половинї 20. сторіча (Одтяты корїня, 1990) і жывот у западній Польщі по другій світовій войнї (На чуджінї, 1992). Тыж быв режісертом філму (2004) о насилным выселїнюЛемків по другій світовій воїнї почас операції Вісла. А. Копча є єдным з першых членів (1991 – ) Світовой рады Русинів Світового конґресу Русинів і быв єй председом (2003 – 2005).
За роботу на благо Лемків быв оцїненый Міністерством културы Польщі честным названём Заслуженый діятель културы (1997).
Боґдан ГОРБАЛЬ
***
Ку многым ґратулантам з найбижшой околіцї юбіланта з нагоды 60-річа од ёго народжіня ся припоюють вшыткы тоты, котры Андрія Копчу знають і з котрыма сполупрацовав або сполупрацує дома і за граніцями Польщі. І наша редакція му желать міцне здоровя, щастя у родинї і многы успіхы у ёго всесстороннім діятельстві.