ТАД приготовлює Фантазію

Театер Александра Духновіча в Пряшові – єдиный на світї професіоналный русиньскый театер, котрый приготовлює у своїй юбілейній 70-ій сезонї свою другу премєру, котров буде твор Фантазія Козьмы Пруткова. Режії ся тот раз в театрї хопив Светозар Спрушаньскый, котрый із театром співпрацовав уж на дакілько пєсах.

Пруткова Фантазія є легоньков комедіёв зо співанками. Публіка ся буде коло позераня на ню файно забавляти. А нелем тото! Козьма Прутков (леґенда, но вєдно з тым выдумка і фікція) – в реалности Алексей Толстой і Алексей Жемчужников, написали „vaudeville“ Фантазія із ясным заміром: пародованём того жанру высміяти ся тунёму смаку втогдышнёй сполочности. Криве дзеркало того твору і днешнїй публіцї вказує то, што денно конзумують. Річі і творы, котры го вже ани не бавлять або бы го бавити не мали. Бо іде о бесцїнну забаву і ґіч. Пєса такы творы нелем зосмішнює, але ся односно них і крітічно ставлять. Кладе вопросы: У якім світї то днесь жыєме? У світї досправдовых вартостей або повсякденной поверьхности? Існує іщі уменя, або лем ёго карікатура? Обколесує нас ґіч – в чінах і думаню? На чім ся іщі (або вже лем?!) в театрї докажеме забавляти? І о тім є кекешна, делікатно себепародічна, но все іронічна театрална комедія спід пера російского класіка.

Премєра Фантазії в Театрї Александра Духновіча в Пряшові одбуде ся дня 11-го децембра 2015 р. о 19.00 год. на Великій сценї.

Go back