Герець Осиф Ткач ославив 65 років од народжіня

Многы люде нелем, што ходять до Театру Александра Духновіча (ТАД) у Пряшові, але і по селах, де ёго драматічный колеків выступать з грами по русиньскы, герця Осифа Ткача добрї знають.Знають го і там, де драмколектів ТАД выступав ці в Братїславі, ці на різных фестівалах дома і за граніцями Словакії. Ёго тварь, міміку, реч, ґестікулацю, зображеня ролей у многых пєсах не мож собі не запамятати, бо они самобытны і выразны. Він грав десяткы ролей спочатку в Україньскім націоналнім театрї (УНТ) у Пряшові по україньскы, а потім в переменованім і перетрансормованім театрї на Театер А. Духновіча – грав по русиньскы.

В якій речі бы не выступав, все ся намагав свої ролї заграти штонайвірогоднїше. Він тіп герця общеспособного, котрый так добрї заграть роль драматічну, траґічну, як і комічну. Не знам, як кому, але менї ся Ошё, як го фаміліарнї звуть колеґове в домашнїм театрї і добры приятелї,  найвеце любить, кідь выступать у комедіалній ролї. В тій ролї векшынов як „дуо“ з герцём Василем Русиняком рад єм все позерав ёго выступлїня і быв єм потїшеный, але і пышный, же русиньскый театер має такых герцїв. То было пару щірых слоб о Ошёви (Осифови Ткачови), котры ня напали при святкованю ёго 65-ых народенинах.

А теперь курто з біоґрафії герця.Народив ся 15. януара 1950 в Будеражі на Українї, в роцї 1966 ся вєдно з родічами перестїговав назад до Чехословакії. По скінчіню україньской Середнёй общонавчалной школы у Пряшові пішов робити до драматічного колектіву УНТ, а кідь ся кус підучів герецькому кумшту і проявив ся, же буде способный будучій артіст, театер го послав штудовати герецьтво до Києва, а то в роках 1970 аж 1974 у Державнім театралнім інштітутї Карпенка-Карого. Вернув ся уж кус світом скушеный і продовжовав у розвитку свого театралного ремесла, пізнїше аж майстровства. Послїднї рокы коло граня у театрї робив і умелецького шефа драматічного колектіву ТАД, а то в часї од 1. авґуста 1993 до 31. децембра 2014. Хоче ся мі вірири, же начерпану мудрость, зручность і герецьке майстровство Осифа Ткача іщі увидиме в не єдній грі ТАД.

З нагоды ёго 65-річчя желам му я і мої колеґове, ёго знамы, міцне здоровя, щастя у родинї і успіхы в роботї.

А. З.