Хто є професор П. Р. Маґочій?

Юбілейный 614-сторінковый зборник (Выдавництво В. Падяка: Ужгород – Пряшів – Ню Йорк, 2015) на честь Маґочіёвых 70-ых народенин вышов недавно і мы вырїшили представити ёго обалку і вступе слово ід зборнику:

Бесспорно, тот зборник ся дістане переважно до рук шпеціалістів, котрым не треба довго высвітлёвати, хто є проф. Павел Роберт Маґочій. Але ай аматерови, якый спознать обсяг выданя, стане такой ясно, же зборник приправленый на честь єдной особы многыма авторами, якы пишуть різнима языками, роблять у різных научных і учебных центрах і жыють у різных частях світа.  Кідь брати до увагы ґеоґрафію публікацій, мож відїти, же свою честь америцько-канадьскому професорови проявили особы, якы жыють як в Северній Америцї, так і в Европі ці Азії. Кідь ся попозераєме на статї веце конкретно, збачіме, же то суть научны статї на честь професора, а тыж поздравны статї – привітаня к ёго юбілею.  Они пришли до зборника (кідь ся рушаме із выходу на запад) з Японії, Україны, Ізраела, Словакії, Білорусії,  Польщі, Мадярії, Нїмецька, Австрії, Сербії, Голандії, Анґлії, Шкотьска, а тыж із многых універзітных центрів США і Канады. Статї і поздравлїня написаны векшынов анґліцькым і україньскым языками, але тыж іншыма языками: польскым, словацькым, російскым і трёма реґіоналныма карпаторусиньскыма языковыма штандардами, якы поужывають Русины/Лемкы (у рамках Польщі), Русины у Пряшівскій области (у рамках Словакії), а тыж войводиньскы Руснакы/Русины (в автономній области Войводина у Сербії).

Ідея выдати зборник на честь проф. П. Р. Магочія ід 70-річному юбілею выникла спонтанно, докінця кус пізно, кідь раховати, же приправа такых колектівных выдань тырвать дость довго. Але, тот факт, же скоро пятьдесятка науковцїв із цїлого світа швыдко зареаґовала на вызву зоставителїв і щіро согласила на честь юбіланта дати до зборника свої новы статї, ясно свідчіть о необычыйній авторітї проф. Магочія у світї наукы.

Бесспорно, в данім припадї іде нелем о єднако думаючіх у сферї наукы, але і приятелїв.

Єдно старе присловя говорить: „Повідж мі, хто твої приятелї, а я повім, хто ты.‟ В нашім припадї одповідь на вопрос „Хто є Магочій?‟ не тяжко найти, прочітаючі у зборнику статї ёго приятелїв. Суть то переважно шпеціалісты у сферї історії і іншых гуманітарных дісціплін. Історіци, літературнознателї, етноґрафы, фолклорісты, музикознателї, палеоґрафы, языкознателї, соціолоґы, політолоґы, ґеоґрафы, бібліоґрафы, – на превеликый жаль, формат вступной статї не доволює  перераховати бодай лем їх призвіска, – про каждого з них оддане служіня науцї є алфов і омеґов їх способу жывота. Зато каждый із них досяг значных высот у своїй сферї і є прикладом наслїдованя про молодых шпеціалістів.

Не є таёмством, же науковы дорогы многых авторів того зборника не раз перетинали ся з путями проф. Магочія – почас міжнародных научных конференцій, сімпозіумів, научных семінарів, у якых він сістематічно брав актівну участь. Багатогранность таленту і глубина заінтересовань професора тому помогли – він ся представив як вызначна авторіта у різних сферах, але в першім рядї як експерт на історію Україны і Централной Европы, а таксамо ай історії і културы карпатьскых Русинів. Але тыж як одборник у проблематіцї церькви, етнополітікы, творіня народів, в области картоґрафії, бібліоґрафії ітд. Удивлять і обсяг ёго публікацій – выше 800 научных робот. І вшытко тото змістило ся до 50 років ёго вірного служіня науцї і 70 років жывота.

Шпеціалну одповідь на вопрос „Хто є Магочій?‟ дає фотолїтопис ёго жывота і дїяльтельства як америцького науковця, якый свого часу прияв позваня Торонтьской універзіты у Канадї і якый сі зволив як тему своїх научных заінтересовань главно проблемы українознательства і карпаторусинства...

Мґр. Валерій ПАДЯК, к. н. (Україна), асоц. проф. Патріція КРАФЧІК (США)