Silvija Lýsinova byla pokarana a ja čekam, že budu rehabilitovanyj

Pročital jem všytky trý prýlohy, kotry zverejnýv Milan Pilip. Kerekanič nas dobri pošpinýl i poohvarjal. Teper sud z Lysinovov dokazal, že Kerekanič neopravneni nas osočuval. Nemal pravdu. A my toto špiniňa našych osob mame ochabýtý lem tak? Bez odozvy? Nemame pravo sja branýtý? Našto zme bojuvalý za zminu vedžiňa v ROS? Ked sja konečni zminýlo vedžiňa v ROS, chočeme dosjahnutý napravu sposobenych krývd, kotry nam bylý sposobleny byvalym vedžiňom Rusýňskoj organizaciji na Sloveňsku (ROS). Okresna organizacija Rusýňskoj obrody u Svýdnýku funguje už 22 rokiv a ja ju zakladal. MO ROS u Svýdnýku založylý može pered 5 rokamý toty funkcionare ROS, kotry chotilý robýtý svoju vlasnu politýku a ja jim do  toj politýky nepasuvav. Kerekanič pýsav, že zrobýlý dobru finančnu politýku, ale to nebyla pravda, bo teper po voľbach sja doznavame, že trebalo komuskaj za ROS zaplatýtý finančny dovhy, bo ROS by nedostala od Urjadu vlady SR na rik 2015 žadny finančny dotaciji. Toto byla dobra finančna politýka?

Ja robýv konkurzny konaňa na opravu cerkvej i na reštavruvaňa ikonostasiv. Realizuvav jem vyberaci konkurzy na dodavateliv robot a bylý to o mnoho komplikovanišy konkurzy, jak je konkurz na šefredaktora novýn InfoRusýn. Znam jak sja majut konkurzy robýtý. Ked Silvija Lýsinova predložyla falošnyj diplom, povýnosťov členiv komisiji i toho, chto konkurz vypýsav, bylo vylučity tot diplom z konkurzu. Takym padom by Lýsinova ne byla uvedena do omylu, prýšla by nato, že sja ne može na konkurznim konani klamatý falošnym vysokoškolskym diplomom. A hneskaj by nebyla sudni pokarana, može byty rada, že sud jej dav lem 300 eur pokutu.To by Lýsinovij  pomohlo do dalšoho žyvota, ale výdýme sami, že panove ji svojima planyma radamý poškodýlý, ne pomohlý. To svidčit o jednim, značit že sja v prýpadi konkurzu na šefredaktora InfoRusýn, jidnalo o nedoslidňu robotu, abo o zamir dakoho z organizatoriv konkurzu, oklamatý literu pravnoj štatnoj konkurznoj normy i za každu cinu zneužytý konkurz vo vlasnyj prospech. Že to bylo tak, nam dokazalo sudne rišiňa. Možno prý tim žertvov sja stala Lysinova, kotra sama mala zvažuvatý nad svojima činmi, ale na svoju vlasnu škodu, ne zvažuvala. Na upozorniňa Milana Pilipa vo vedžini ROS bralý ohľad, jidnalý, ale joho sťažnosť či upozorniňa, vse vyrišylý vo vlasnyj prospech. Dokince i predsedničku dozornoj rady ROS ignoruvalý, jak jim povila pravdu do oč. Aj vyrok dozornoj rady ROS nerešpektovalý. Robýlý sobi, što sja jim zachotilo. Tomu sja povidat korupcija. To nebylo demokratýčne.

Zo mnov zrobýlý iši horše, vylučilý ňa z ROS bez toho, žeby mi dalý možnosť sja vyjadrýtý ku tomu, čom mene vymitujut z ROS. Napýsalý svoje rozhodnuťa o mojim vylučini i dalý mi ho do ruky a rob sobi s tym što chočeš. Moji sťažnosti, že to je nespravodlýve odnosno mojij osobi, absolutni nerešpektovalý. Poškodýlý tym moje dobre meno a iši aj to zverejnýlý v novýnkach, što nakonec bylo verejni zneužyto proti mojij osobi. A ked jem napýsal članok do InfoRusýna, nikda mi ho ne zverejnýlý. To nebyla demokracija, ale verejne šikanuvaňa ľudej členiv ROS. Samosobov, že teper čekam od novoho vedžiňa ROS i od KV ROS jak najvyššoho organu ROS napravu sposoblenoj škody voči mojij osobi. Nechoču pomstu, ale rozhodni choču, žeby KV ROS zrušylo pravoplatnosť rozhodnuta o mojim vylučiňu z ROS, bo prý tim porušyly moje osobne pravo na obranu vlasnoj osoby. Rozhodnuťa vydane voči mojij osobi, bez možnosti na vlasnu obranu, neje demokratýčne, je nespravodlýve,  bylo to nasýlne, jednostranne rišiňa, a take nasýlne, virolomne rišiňa, nemože matý pravoplatnosť. Aj tot čolovik, što je vrahom, maje možnosť na sudi sja branýtý, ale mi taku možnosť bohužaľ nedalý. Porušylý moji osobny ľudsky prava. Zato teper verejni žadam sučasnoho predsedu ROS MIlana Mňahončaka, žeby jem byl zaklýkanyj na najblýžše zasadaňa KV ROS, de choču v bodi rizne požadatý KV ROS, žeby odsuhlasýlo vydaňa rozhodnuťa o zrušyni rišiňa byvaloho VV ROS o mojim vylučiňu z ROS, aj choču zdovodnýtý čom rišiňa o mojim vylučiňu z ROS, maje bytý vyhološene za nepravoplatne. Tak isto vylučiňa okresnych organizaciji zo štruktury ROS, pered sejmom ROS v Bardejovskych Kupeľoch, malo bytý dane na konzultaciju členam ROS v okresnych organizacijach, žeby sja členove sami o sobi rišylý, jak budut dale funguvatý, ale byvale vedžiňa ROS toto nezrobýlo, bo chotilý prosadýtý svoji osobny interesy a jim nevyhovijucich členiv ROS sja takym padom zbavýlý.

OO RO u Svýdnýku pokračuje v roboti  spravnym smerom, ale jaku narodnostnu politýku robýt MO ROS u Svýdnýku? Politýku mertvoho chrobaka. I tot bod naj bude na najblýžšim zasidani KV ROS projidnanyj. Kerekanič odputav pozornosť ROS od pilitýčnoj ukrajinizaciji Rusýniv, kotru opravduvav tym, že uputav pozornosť na peršorjadu potrebu starostlývosti o rusýnskyj folklor. Aj toto je potribne, ale v časi obrody naroda to neje peršorjade, ale až das 8-rjade. Zato  svojima nazoramý Kerekanič poškodýv ideju i cili rusýnskoho narodnoho obrodžiňa. Panove byvaloho vedžiňa ROS všemožni brojilý, a može i teper borjat, proti zakladaňu platformy OSRS, vďaka kotrij my teper mame možnosť sja domahatý spravodlývosti i tu pýsatý na internetovij stranki svoji pohľady. Možeme od členiv byvaloho vedžiňa ROS teper čekatý plodnu spolupracu v platformi OSRS? Ja dumam že ne možeme. Zato taky ľude už by nemalý stojatý na čeli narodnoho rusýnskoho ruchu. Sklamalý. Nýchto sobi ne želat pomstu, ale oni svojima nespravnyma pohľadamy dovelý organizaciju ROS do ideovoj dezorientaciji, do organizačnoho rozkolu i do nepotrebnych osobnych sporiv medzi členamý ROS. Zato nýchto z byvaloho vedžiňa ROS už ne maje moralne pravo byty v dajakij funkciji v ROS, bo znovu sja može zopakuvatý toto, što už zme zažylý na vlasnij skori za byvaloho vedžiňa ROS.

A my sja tomu chočeme vyhnutý, treba zrobýtý preventývne opatriňa. Tych členiv ROS, kotry poukazovalý byvalomu vedžiňu ROS na nedostatky, trestalý  i vylučuvalý z ROS.To nebyla demokracija, ale teror. Mame sja na toto smotritý jak keby sja nič nestalo? Zato zme chotilý zminu byvaloho vedžiňa v ROS, žeby konečni došlo do zlipšiňa sýtuaciji i do napravy chyb sposobenych byvalym vedžiňom ROS. František Dancak u svojij publikaciji o naboženstvi pýše, že dobryj pestovateľ i hospodar  spalýt škodlývyj kukoľ ked nato prýjde čas žatvy. A ja sobi dumam, že tot čas žnyv po voľbach novoho predsedy ROS, prýšol. Prýšol čas kolý škodlývyj kukoľ treba spalýtý, žeby nepoškodýv urodu, jaku prýnošat ideja narodnoho obrodžiňa Rusýniv. ROS je zrjadžena zato, žeby od štatu žadala narodnostnu politýčnu spravodlývosť ku Rusýnam, a chto choče žadatý spravodlývosť ku druhym, mal by bytý i sam spravodlývyj. V prýpadi byvaloho vedžiňa ROS to tak nebylo.  

Jan KALÝŇAK, Svýdnýk

(Titulok je danyj redakcijou, ale cilyj text staťi prýnosýme v originaľi avtrora.)