Нова книжка – Простерто на Підкарпатьскій Руси

Як інформує на своїм сайтї Общество приятелїв Підкарпатьской Руси (Společnost přátel Podkarpatské Rusi), орґанізація в остатнїх днях выдала свою нову публікацію в чеськім языку під назвов Простерто на Підкарпатьскій Руси (Prostřeno na Podkarpatské Rusi). Публікація добра про тых, котры бы хотїли посмаковати собі на підкарпатьскій русиньскій кухни.

Збірку, як інформує сайт, „карпаторусскых“ рецептів приготовила Даґмар Бжезінова із общества. До книжкы приспіли і приятелї ці чітателї часопису „Podkarpatská Rus‟, якый Общество  выдаватьштирираз до рока і в котрім редакція дакілько раз вызывала чітателїв ід сполупраці над приправлёванов книжков рецептів. Просьбы были выслуханы і „до редакції ходили рецепты родічів і властны рецепты на приготовлїня русиньскых і підкарпаторусскых страв“, інформує сайт. Книжка є обогачена фотоґрафіями Їжіго Гавла і авторкы книжкы, котра вшыткы стравы нелем сама спробовала наварити, але таксамо фотоґрафічно звічнила.

Общество приятелїв Підкарпатьской Руси (Společnost přátel Podkarpatské Rusi) є обчаньскым здружінём, котре было засноване у 1990 роцї і розвивать свої актівіты в Чеській републіцї. Окрем іншого є і членьсков орґанізаціов Світового конґресу Русинів за Чехію. Ідейно ся одкликує на дїятельство Клубу приятелів Підкарпатьской Руси, котрый быв заснованый в міджівойновім періодї в Братїславі. З актівіт общества суть найглавнїшымапроглублёваня односин із жытелями і орґанізаціями Закарпатьской области Україны, бывшой Підкарпатьской Руси, підпора Русинів на теріторії Чехії ці популарізація Русинів в Чеській републіцї. Общество выдавать і часопис „Podkarpatská Rus“, а таксамо і далшы неперіодічны публікації.

Книжку мож обїднати на адресї: Dům nár. menšin, SPPR, Vocelova 3, Praha 2, 120 00, або через мейлову адресу J.V.Havel@seznam.cz.

Петро МЕДВІДЬ