Дякую вшыткым сімпатізантам інтернетовых новинок – Академія русиньской културы в СР
На кінцю старого рока 2015 дякую вшыткым нашым сімпатізантам, чітателям і сполупрацовникам зато, же нам зістали вірны. Затоже рік 2015 быв про редакцію інтернетовых новинок Академія русиньской културы в Словацькій републіцї дотеперь єдным з найтяжшых на їх приправу і выробу, главно односно мізерной штатной дотації.
Треба отворено повісти, же на винї тогорічной слабенькой дотації на нашы інтернетовы новинкы суть самы нашы Русины, конкретно члены одборной комісії при Урядї уповномоченого влады СР про народностны меншыны, але і спомянутый уряд сам.
О подробностях ся мі не хоче говорити, але хотїв бы єм вірити, же на далшый рік в рамках фінанчной помочі Уряду влады Словеньской републікы у проґрамі Култура народностных меншын 2016 буде сітуація намного лїпша. Бо не хыбовало много, і по роках выдаваня бы перестали выходити.
В новім роцї уж інтернетовы новинкы Академія русиньской културы в СР не будуть выходити. Намісто того будеме дале продовжовати у розвитку нашой вебовой сторінкы під таков істов назвов, вкладанём до окремых єй рубрік найінтереснїшых і найважнїшых справ з історії і сучасного културно-сполоченьского жывота Русинів. Самособов, то є наш план, але ці досправды будеме продовжовати у розвитку нашой вебовой сторінкы www.rusynacademy.sk, то буде залежати на схвалїню і запропонованю належной штатной дотації одборнов комісіов про русиньску народностну меншыну при Урядї уповномоченого про народностны меншыны Влады Словацькой републікы, як і на рїшіню спомянутого уряду.
Наше щіре подякованя належить нашым чітателям, котры были терпезливы, толератны і вірны, бо не з нашой вины дакотры чісла новинок не вышли найякостнїшы. Мали сьме добру представу, як їх зробити, але выслїдок нашого снажіня не все быв такый, абы сьме ай мы самы были з ним спокійны. Од нового року перестанеме выдавати інтернетовы новинкы під назвов Академія русиньской културы в СР, і так, як передтым, дале плануєме розвивати вебову сторінку тыж під назвом Академія русиньской културы в СР. Віриме, же ся нам то подарить од Нового рока.
Не будьме смутны, бо добре дїло не загыне. Будьме радостны, же многы люде зістали людми. Будьме щастливы, же ся ближать прекрасны рождественны свята і тїшме ся з них. Мы, творителї інтернетовых новинок Академія русиньской културы в СР, желаме вам прожыти ріствяны свята в божій благодати. Хотїли бы сьме зажелати Вам лїпшый новый рік 2016. Дай, Боже, каждому доброму чоловікови благословлїня.
Александер ЗОЗУЛЯК, шефредактор